Pyniakhaid ka Shillong Lajong ha ka minit ba khatduh pyrshah ia ka Nongrim Hills ha ka SPL

Syllad | The Rising MeghalayaFebruary 21, 2025

Ka Shillong Lajong FC da ka said ka la lah ban pyniakhaid da 1-1 ha ka jingiakhun pyrshah ia ka Nongrim Hills SC lyngba ka jingioh ia ka penalty ha ka minit kaba khatduh ha ka lympung ialehkai jong ka OC Blue Shillong Premier League 2024 kaba la long ha ka 20 tarik Rymphang ha madan SSA First Ground Polo.

Ka Lajong lah ban shim ba ka long kaba donbok namar ha baroh ka jingialehkai ha ka kylla miet ka la shah tam da shikol, hynrei ha ka minit kaba (90’+5) ka la ioh ban pynkhaid lyngba ka penalty ba la shut da u Iohborlang L Lyngkhoi.

Ka jingialehkai ha ka kylla step ka la long kaba mar iakhaid ha kaba ym shym la don ki ban ioh pynkhih jar. Hynrei, mar ia sdang ka kylla miet ka Nongrim Hills lyngba u Bankyrshan Ryndong ka la ioh ban thep ia ka shi kol ha ka minit kaba 47 bad kaba la ai mynsiem shuh shuh ia ki rangialehkai ka kynhun.

Ka jingmih na kane kalong ba ka Lajong ka la pynioh lad ia ka lahduh jong ka samoi ba la dep ka Mawlai SC ia ka kabu kaba khraw. Ka Lajong mynta ka ioh 33-point na ki 14 tylli ki jingialehkai, katba ka Mawlai ka la ioh 35-point na ki 13 tylli ki jingialehkai bad don mynta ha ka kyrdan kaba nyngkong.

Ka Nongrim Hills ka la neh ha ka kyrdan kaba phra, bad ka la iakhaid pat ha ka jingioh point bad ka Sawmer SC, kata mar 15-point hynrei ka Sawmer kala tam ha kaba iadei bad ka jingioh thep kol.

Ka jingiakhun ha ka 22 tarik Rymphang (Saitjain) kan long hapdeng ka Ryntih FC pyrshah ia ka Laitkor SC ha ka por 11 baje mynstep katba ka Sawmer kan iakhun pyrshah ia ka Mawlai ha ka por 3 baje nohphai sngi.