Pyniakhaid ka Lajong FC da 1-1 pyrshah ia ka Rajasthan United shwa ban wai ka jingialehkai

Syllad | The Rising MeghalayaDecember 4, 2023

Ka Shillong Lajong FC ka la lah ban pyniakhad da 1-1 ha ka minit kaba khatduh lyngba ka kol ba la thep da u Daniel Goncalves ha ka jingiakhun pyrshah ia ka Rajasthan United ha ka jingialehkai kaba la long haka Sngi U Blei ha Hyderabad.

Kane ka jingialehkai kam shym la long kaba iaid beit na ka bynta ka Lajong naduh kaba sdang jong ka jingialehkai ha kaba ka la shah thep mar ia sdang ka jingialehkai, kata ha ka minit kaba khyndai lyngba u Richardson Kwaku Denzell ka Rajasthan United. Watla katta ka Lajong kam shym la duh jingkyrmen ne randien hynrei ka la bteng ban iakhun tyngeh.  

Ha ka jingshisha ka Lajong ka la ioh shibun ki kabu ban khyrwit sha kol hynrei kam shym la lah ban pynkylla iaki sha ka kol, hynrei tad tad hadien ka jingpynjlan ia ki minit ialehkai jong ka kylla miet ba u Goncalves u la ioh ban pynkhih jar ha ka minit kaba 97 jong ka jingialehkai ban wanrah ia ka point kaba kongsan sha la iing.

Kane ka jingiakhaid ka mut ba ka Lajong kam pat shym la mad satia ia ka nam rem naduh kaba sdang jong ka jingialehkai, kata ha ryngkat ka Mohammedan Sporting ka bym pat shym la shah rem ha kane ka jingialehkai I-League jong kane ka samoi, bad mynta ka Lajong ka don ha ka kyrdan kaba 4 ha ka miej khein point  ki 13 point kiba ka la ioh na ki hynniew tylli ki jingialehkai, kata ka jingjop kaba laisien kynthih bad sawtylli ki jingiakhaid.

Mynta ka Lajong kan wanphai pat sha la iing na ka bynta ban pynkhreh ban iakhun pyrshah ia ka Churchill Brothers na Goa ha ka 6 tarik mynta u bnai ha  madan SSA Stadium, Shillong ha ka por 2 baje nohphai sngi.