Pynher ka HITO iaka lama Khasi State ha Lum Shillong, ban pyntreikam iaka IOA & AA

Syllad | The Rising MeghalayaAugust 18, 2025

Ka Hynñiewtrep Integrated Territorial Organization (HITO) ka la rakhe ia ka 17 tarik Nailar 2025 da kaba pynher ia ka lama jong ka Khasi State ha Lum Shillong.

Kane ka sienjam ka long ka dak ka jingpynkynmaw ia ka sorkar Meghalaya ban leh ei ei halor ki jingbthah ba la pynmih da ka National Commission for Scheduled Tribes (NCST) ha u snem 2012 bad 2014 kaba pynksan halor ka jingdonkam ban pynrung ia ka Instrument of Accession and Annexed Agreement ha ka Riti Synshar jong ka Ri India kum ka Article kaba kyrpang ka ban pynthikna ia ki hok bad ka kyrdan jong ka jaidbynriew Khasi bad Jaintia.

Ha kane ka juh ka sngi ka HITO ka la aiti ruh ia ka dorkhas sha u Lat ka Jylla u CH Vijayashankar ban kyntu ia ka jingtuklar lem ka jong u ban pyntreikam ia ki hok jong ki jaidbynriew Khasi bad Jaintia kumba la kdew ha ka Instrument of Accession bad Annexed Agreement (IOA & AA)ba la ia soi ha ka 17 tarik Nailar 1948.

Katkum ka jingong jong ka HITO, ka Instrument of Accession bad Annexed Agreement ka ai ka jingithuh halor ka kyrdan bad ka hok ba kyrpang jong ka Khasi State ka bym pat shym la urlong wat hadien palat 75 snem jong ka jingiasoi.

“Ngi kyrpad da ka jingburom ia ka jingtuklar lem ba mardor ka jong phi bad ka sorkar Meghalaya. Ngi kyntu ia ka jingshimkhia ba shimet jong phi bad ka sorkar jylla ban jubab bad aiti ia ka kaiphod sha ka Ministry of Home Affairs ha kaba iadei bad ka jingpyntreikam ia ka National Solemn Commitments ba la kdew ha katei ka jingiateh soskular,” ong u President ka HITO u Bah Donbok Dkhar ha ka dorkhas.

U la ong ruh ba ka National Commission for Scheduled Tribes (NCST) ka la pynmih ia ka jingbthah ha u snem 2012 bad 2014 ha kaba la ban jur ia ka jingdonkam ban pynrung ia ki jingiateh ha ka Riti Synshar ka Ri India ban pyndep ia ki jingkular ban pynthikna ia ka kyrdan kaba dei hok jong ka jaidbynriew Khasi bad Jaintia.

“Ka sngi jong ka 17 tarik Nailar 1948 ka pynpaw ia u mawjam ha ka history ka jong ngi, namar dei ha kane ka por ba u C Rajagopalachari u Governor General ka India u la pdiang ia ka Instrument of Accession bad  Annexed Agreement, da kaba pynskhem ia ka kyrdan ba kyrpang jong ngi kum ka jaidbynriew bad ka jingiada ia ka tynrai ka kolshor jong ngi,” ong u Bah Donbok da kaba ban jur ba ka jingpynslem ban pyntreikam ia ka jingkular ba la mynjur ha kane ka jingiateh kan don ka jingktah kaba khraw ia ka imlang sahlang, ka kolshor bad halor ki ain jong ka jaidbynriew Khasi bad Jaintia.