Pyndonkam hok ka Sorkar MDA iaka pisa, iaroh ka Sitharaman haba pyllait iaki projek kiba kot T.1,087 Klur ha ka Jylla

Syllad | The Rising MeghalayaJuly 12, 2025

Ka jylla Meghalaya ka la sakhi ia ka jingiaid lynti ha ki kam pynroi ki ban sahkynmaw hadien ba ka Myntri Pla tyngka bad Corporate Affairs ka Sorkar India ka Nirmala Sitharaman ka la plie bad buh ia ki mawnongrim ia ki project bapher bapher ha ka jylla kiba kot sha ka T.1,087.81 Klur ha ka jingialang jong ka Integrated Public Programme kaba la long ha LARITI – International Centre for Performing Arts and Culture.

Haba kren ha ka jingialang, ka Nirmala ka la iaroh ia ka jingkiew shaphrang jong ka Meghalaya ha ka roi ka par bad ka jingiohi jngai hapoh ka jingialam jong u Myntri Rangbah ka Jylla u Conrad K Sangma

Haba pyntp ba haduh T.5,400 klur la dep ban bhah sha ka jylla Meghalaya lyngba ka Special Assistance to State for Capital Investment (SASCI), ka Myntri ka la ong, “Nga sngewkmen shibun ba ka sorkar ka la pyntreikam bha ia kane ka song pisa na ka bynta ki jingtei bapher bapher. Ngan buh ha ka rekod ia ka jingai khublei ka jong nga halor ka jingpyrshang jong ka Meghalaya kaba la lah ban pyndonkam pura ia ka song pisa.Katto katne ki jylla kim shym la lah ban pyndonkam pura ia ka bhah kaba la ai.”

Haba pynpaw halor ka jingbteng ia ka jingkyrshan na ka Sorkar Pdeng, ka Nirmala ka la ong ba ka Sorkar ka la phaikhmat sha ka thain Shatei Lammihngi kum ka thain ia ka ban pynkupbor, ban leh ei ei, ban pynkhlain bad ban pynkylla.

Ka la kdew ruh ha kaba iadei bad ka jingshna ia ka surok kaba 540 km ha Meghalaya bad ka jingkiew kaba san shah halor ka jingpynbang ia u optical fibre naduh u snem 2014.Ka la iaroh ruh ia ka jylla halor ka jingpyntreikam ia ki skhim kum ka Jal Jeevan Mission, PM Awas Yojana, PM Jeevan Jyoti Bima Yojana, Swachh Bharat Mission nalor kiwei pat.

Nalor kata ka la ong ba ka pisa baroh kaba la ai sha ka Meghalaya naduh u snem 2021 haduh mynta ka long T.5,400 Klur, bad ka pynpaw ia ka jingkmen ban iohi ia ka jinglah ban pyntreikam bha jong ka sorkar Meghalaya ia kane ka pisa.

U Myntri Rangbah ka Jylla u Conrad K Sangma haba kren ha ka jingialang u la pynpaw ka jingsngewnguh ia ka Sorkar Pdeng halor ka jingbteng ban ai ia ka jingkyrshan na ka bynta ka Jylla Meghalaya.

U la ong,” Kane ka jingwan jngoh jong ka Myntri Pla tyngka ka long kaba kongsan, ym tang haba iashim bynta ha ki prokram hynrei ruh ban pyniasoh bad ki nongshong shnong ka jylla, ban sngewthuh mardor ia ki jingeh kaba ngi iakynduh, bad ban btin lynti bad wad ia ki lad ban weng ia ki jingeh bad ia ki sienjam ban iaid shakhmat.”

U la pynpaw ruh ia ka thong jong ka sorkar Jylla ba kan long kawei na ki Top 10 State jong ka ri  kat haduh u snem 2032.U la kdew ruh halor ka thong jong ka sorkar ban kynjo sha ka 10 billion USD  ka jingkiew ha ka ioh ka kot, bad hadien ki hynniw snem jong ka jingbteng ban pyniaid ryntih ia ki kam ki jam, ka Meghalaya mynta kala jan ban kot sha ka 6 billion USD ha ka ioh ka kot ha ryngkat ka jingkiew kaba jan kot sha ka 15% kaba kham heh ban ia ka National Average.

Nalor kata u pyntip ruh sha ka Myntri Pla tyngka ba ka Meghalaya ka la ioh ia ka jingjop ha ka jingpyntreikam ia kiba bun ki skhim bad ki project lyngba ka Externally Aided Projects (EAPs), kaba long kum ka tyllong kaba kongsan ha ka jingbei tyngka ia ki jylla kiba rit. Kine ki sienjam ki la iarap shibun ia ka jylla ba kan lah ban pyntreikam ia kiba bun ki project kam pynroi kiba la jan kot sha ka T.12,000 klur bad kiba la noh synniang shibun sha ka roi ka par jong ka jylla baroh kawei.

Ki project kiba kongan ba la pyllait paidbah ha Meghalaya ki kynthup ia ka 75 Digital Libraries ha ki thain nongkyndong (T.162 klur SASCI) kaba la pyntreikam da ka State Rural Employment Society, bad lyngba kane ka sienjam yn ei ia ki 750 tylli ki Digital Library ha ki thain  nongkyndong ban pyniasoh ia ki samla bad ka National Digital Library ka ban pynshlur ba kin sngewtynnad ban pule.

Ka jingpynroi biang ia ka pung Umiam (T.120.81 Klur, SASCI): Ka project ki kam jngohkai ban pynkylla dur ia ka pung Umiam sha ka eco-tourism kaba don ha ka kyrdan ka pyrthei ia kaba la khmih lynti ba kan khring ia palat 1.27 lak ngut ki nongwan jngohkai man la u snem bad pynmih kumba 4000 tylli ki kam.

Ka MICE & Tourism Infrastructure ha Mawkhanu (T.103 Cr, SASCI): Kaba don ha ka jaka kaba 106 akar ka ban kynthup ia ka Meghalayan Experience Theme Park, ka amphitheatre, bad festival zones ban kyntiew ia ka kam jngohkai.

Ka Mawkhanu Football Stadium (T. 732 klur, ba la tyrwa bei tyngka SASCI): Ka state-of-the-art complex ka ban don ia ka residential football academy da ka jingiatreilang bad ka NorthEast United FC bad ka ban pynskhem ia ka Meghalaya kum ka Football Capital jong ka ri India.

Ka Working Women’s Hostels (T.132 klur, SASCI): Kaba shngain, kaba jaka sah kaba lah ban kot bor ha Shillong (400 jingthiah), bad Jowai, Byrnihat, and Tura (mar 200 jingthiah), ka ban kyrshan ia ki kynthei kiba trei.

Ka Office-cum-Residential Complex ka CBIC, New Shillong (T.256.23 Klur): Ka jaka treikam kaba katkum kane ka juk kaba mynta ban pynkhlain ia ka rukom treikam jong ka CBIC hapoh ka jylla Meghalaya.

Ka Northeast Regional Campus jong ka Indian Institute of Corporate Affairs, Mawkhanu (T.100.95 Klur, PM’s DevINE): Ka jaka kaba kyrpang na ka bynta ka Corporate Governance, ka jingwad bniah ha ka liang ka ioh ka kot bad ki kam aijnghikai ha ka thain shatei lammihngi. Kadei ha ka sien kaba nyngkong ba ka IICA kan don ruh ia ka ophis Shabar jong ka nongbah Delhi.

Ha kane ka jingialang ka la don ruh ka jingsam ia ki ‘Cheque’ ia kiba ioh jingmyntoi lyngba ka scheme kum ka PM MUDRA, PM SVANidhi, PMEGP bad NPS Vatsalya, kaba pyni ba ka sorkar ka iengskhem ban ai jingiarap pisa ha ki shnong ki thaw.