Pyndep u Dolloi Shangpung iaka Ku Tyngkong Yung Langdoh ban ioh jingithuh na u khun u raiot

Syllad | The Rising MeghalayaApril 9, 2022

Ka long ka sngi sah jingkynmaw hapoh elaka Shangpung ha kaba u Dolloi ba pura ka elaka u Chanki Langbang haka 8 tarik Ïaiong ula pyndep ia Ku Tyngkong ha ïing Langdoh ne ka jingrung iing Langdoh, kaba man la uwei pa uwei u dolloi ka elaka u hap ban leh ban ioh iaka jingithuh na ka Duwan ka Yung U Langdoh ne ka iing Langdoh bad u khun u raiot ka elaka.

U Chanki Langbang ula shah jied kum u Dolloi ba pura ka Elaka Shangpung dangshen haka jingjied dolloi kaba la pynlong ka JHADC haka 23 tarik u bnai Lber.

La sakhilang ia kane ka Ku Tyngkong Yung Langdoh u Ma Chanki da u khun u raiot ka elaka bad ki kum juh ki paralok para jor bad ki kur ki kha. Nyngkong la pyndep ïaka lehniam ha Yung Langdoh bala lamkhmat da u Langdoh Waheh Ham Lamare pynbud ka Pyrnah Pyrjin bad u Tylli kyntien da ki Niaw Kur ba kynthup ïa ka Kur Dhar, Sungoh, Phyllei-Langbang, Lamare, Suiam-Langstang, Sutnga-Saioo bad ka Kur Papang katba ka bynta ba bud jong ka niam la pyndep ha ka jingpynïaid u Bor Maji na ka Kur Sungoh kumjuh ka Langdoh.

Pule | U Chanki Langbang u Dolloi ba pura ka Elaka Shangpung

Shuh shuh ha kane ka sngi na ka liang ki khun ka elaka Shangpung haka jingpynïaid u Connsiderwel Shadap Manner General Secretary Seinraij Shangpung kum ka dak ka jingkmen ba la ïoh ïa u Pa dolloi ba pura ka elaka ka la pynlong ïaka program pynkup burom ha kaba ki khun samla ka elaka hala ka riam ba iphuh iphieng ki la ïashim bynta ban kiew tyngkong da ki jingshad bad jingrwai.

U Pa Dolloi ka elaka Shangpung u Chanki Langbang haka jingkren ula pynpaw ka jimgsngewnguh ïa baroh ki khun ka elaka ba la ïoh ka jingmynjur naduh ka Dorbar Briew haduh ka Dorbar Blei, ula kular ban shakri khuid shakri hok ïaki khun ka elaka khlem da niew shiliang khmat.