Pyndep ki 22 ngut iaka jinghikai thaw khiew ranei ha Tyrshang

Syllad | The Rising MeghalayaOctober 15, 2023

Kum ka jingkyrshan iaki 22 ngut ki nongthaw khiew ranei kiba la dep iaka jingshah hikai naduh 17-10-2022 haduh 03-03-2023 ha Common Facility Centre ka Lurshai Pottery Cooperative Society Tyrshang, ka Dakti Craft, Shillong da ka jingkyrshan ka Meghalaya State Skill Development Society kaba hap haka tnat Labour ka Sorkar Meghalaya haka 13 tarik Risaw ka la sam Certificate bad tiar jingïarap sha ki nongthaw khiew ranei kum ban kyntiew iaki ba kin nangpynheh shuh shuh iaka kam thaw khiew khyndew (Pottery).

Ki nongthaw khiew khyndew ha Rilum Jaintia na ka bynta ban shet pu tharo bad kiwei kiwei ki jingbam Khasi Pnar, ki don tang haka shnong Larnai bad ka shnong Tyrshang bad kane ka kam kila ioh pateng. Ban pynbha shuh shuh ia kane ka kam kila ioh ka jinghikai na ka Dakti Craft da ka jingkyrshan ka Meghalaya State Skill Development Society ha ki san bnai kynthih bad kane kan nang kyntiew shuh shuh iaka lad kamai jakpoh ki nongshong shnong ka thain.

Ka Dakti Kraft Shillong kadei kawei ka seng kaba pynmih iaki tiar bad ai jingshakri ha kaba iadei bad ki tiar shna kti kiba la buh pateng ki mynbarim bad ki tiar kiba ka pynmih dei kiba la shna da ki skhen ki siej, khyndew, rimet bad ki jait ksai ba pynmih ka mariang khlem da pyndonkam plastic.

Hashwa ban sam iaki tiar jingiarap ka la don ka jingialang ba la pynlong ha CFC ka Lurshai Pottery & Multipurpose Cooperative Society, Tyrshang ba la pyniaid da u Bah Lambormi Suchen, Skill Development Officer haka jingdonlang u Namphrang Diengdoh, Training Manager, Dakti Kraft, Shillong, u Daniel Syiemiong, Inventory Manager Dakti Craft, u Wanki Dkhar, Waheh Chnong ka Tyrshang ki Executive Member ka Shnong Tyrshang, ka S E Kharpran Functional Manager ka DCIC Jowai, u Kmen Shylla, u Deputy General Manager ka NABARD u G N Kharlukhi, u Block Development Officer Dr. B S Langbang bad u General Manager ka District Commerce & Industries Jowai u B Warjri.

U Daniel Syiemiong, Inventory Manager Dakti Craft, ula ong ia mynta ka iew ka ap ia kiba kum kine ki tiar hynrei ki nongpynmih ki dang duna kumta ka long kaba donkam ban don shibun ki nongthaw khiew khnang ban lah ban pynmih shibun kum kine ki tiar bd ula ong ki tiar ba la shna da ki longkmie la lah ban pyniaid iew shaduh sha Delhi haka Meghlayan Age the Store, ha ki iew online kumjuh shabar ka Ri India ruh.

U Deputy General Manager ka NABARD GN Kharlukhi ula iathuh ba na ka liang ka ophis jong u ka la ioh ban sdang noh ia GI tag exercise na ka bynta ki nongthaw khiew ka District.

U Block Development Officer, Dr. BS Langbang ula pynshlur iaki nongthaw khiew ban trei shitom shuh shuh bad ula kyntu ban shim kabu ia kane ka programme khamtam eh ka ai jingiarap shibun iaki longkmie haki kam bapher bapher.

U General Manager ka DCIC ula ong ba na ka liang ka ophis jong u kan iai trei shitom shuh shuh ha ka ban kyntiew iaka ioh ka kot ki nongthaw khiew da kaba iatreilang bad ki tnat treikam sorkar bapher bapher.

U Mithing Shylla uwei na ki nongthaw khiew ula pynsngew iaka jingsngewnguh ia baroh kiba la ai jingïarap naduh ka Meghlaya State Skill Development Society ka Dakti Craft bad ki dkhot ka District Skill Committee kiba la trei shitom na ka bynta ki nongthaw khiew ban pynioh iaka Training, ki Certificate bad ki Start up Tools ba ki ioh ban pyndonkam haki jingtrei jong ki kiba man ka sngi.