Pyndep ki 20 ngut ki samla kum ki nongiarap haka kam jngohkai ha Nartiang

Syllad | The Rising MeghalayaMay 28, 2025

Haduh 20 ngut ki samla kila pyndep iaka jingshah hikai pyntbit ialade ban long ki nongiarap haka kam jngohkai pyrthei ne ki guide ban ialam iaki nongwankai suwari bad ban iathuh iaka jinglong jingman ka jaka bad ki khana.

Kane ka jinghikai ka dei kaba la pyniaid ka Society for Urban and Rural Empowerment (SURE) bad kaba la kyrshan da ka ophis ka District Tourism Officer bad u District Skill Development Officer.

Kine ki ar ngut ki ophisar kynthup iaka Kong SD Shylla District Tourism Officer bad u Lambormi Suchen District Skill Development Officer ka West Jaintia Hills shuwa ban ai iaki syrnot sha kine ki samla kila jngoh iaki Mawbynna ha Nartiang, bad iaka temple Maa Jayanti.

Ka Kong SD Shylla haba kren kala ong ba ka Nartiang ka dei kaba donbok ha kaba ka don ia ki jingïohpateng (heritage) bad kumjuh ruh ia ki temple kiba lah ban kyntiew ia ka kam pilgrimage tourism. Kala pynkynmaw ruh ïa ki samla ba ki guide ki dei kum ki khmat jong ki tourist bad ki dei ban khmih bha ruh ia ka jingshngaiñ (safety bad ka security) jong ki tourists. Kala ban jur ia ka shnong bad kumjuh ruh ïa ki guide ba ki dei ban pynlong ïa ka shnong kaba khuid namar ka khuid ka suba ka dei ka kongsan ha kaban khring ïa ki nongwan jngoh kai pyrthei.

U ma Lambormi Suchen ula iaroh ia ka shnong hapoh ka jingïalam jong u Waheh Chnong u C Myria ba kala ai ka jingkyrshan ïa ki office ban pynlong ia kane ka training. Ula kyntu ruh ia ki samla ba kin pyndonkam hok ïa jinghikai kaba kila ïoh khnang bad kan long ka lad ïohkam ïohjam ïa ki.

U Dr HH Mohrmen, Secretary SURE ula pynpaw ba ula don ka jingïadei kaba jan bha bad kane ka shnong naduh ki por kiba mynshuwa bad ka jingaitraining ia ki samla ka dei kawei na ki jingangnud ka jong u. Ula ong ruh ba u sngewkmen ba tip ba kine ki samla kila sdang ban ïoh guide tang hadien katto katne sngi bala dep ai training iaki.