Pyndep ka Seiñraij Mukhla ïaka lehniam Knia Ryngkaw

Syllad | The Rising MeghalayaApril 11, 2021

Ka Seiñraij Mukhla kala pyndep ïaka jingleh niam Knia Ryngkaw uba long u blei uba ha khlieh tam nabaroh ki blei kiba don hapoh ka Raij Mukhla haka Sngi U Blei.

Kane ka jinglehniam kadei kaba ju leh manla u snem ha une u bnai Iaiong shuwa ban hiar rep ne bet ia u symbai kba sha ki hali ki pynthor.

“U Syiem Ryngkaw u dei u blei nong ri nong sumar ia ngi ki khun ka Seiñraij Mukhla ha baroh shi lynter ki snem bad u pyllait ia ngi na ka pang ka shitom, ka khlam ka ngoh bad roi par haka kamai kajih ka pule ka puthi bad ha baroh ki liang wat lada ngi shong ngi sah ngi trei ngi ktah sha palat u Ryngkaw na shabar ka raij,” la ong u Standbyme Sari, Waheh Sankur naka kur Sari.

Ula ong shuh shuh ka jingknia Syiem Ryngkaw kadei ka jingleh niam kaba saw hapoh ka Seiñraij Mukhla. Ki jinglehniam ba pyndep ka raij ki kynthup ïaka knia Syiem Pyrthat, ka jingleh niam Knia ia ka Syiem Kupli bad u Yale, ka jingleh Niam Knia ia ka Syiem Klam bad u Ram Shyllong bad khatduh mynta ngi lah pyndep ia kane ka jingleh Niam Knia Ryngkaw kaba long ka jingleh Niam kaba heh tam hapoh ka Seiñraij Mukhla.

Lada ym lah ban pyndep ïa kine ki jingleh niam Knia Ryngkaw, ka Seiñraij Mukhla kam lah ban pynlong ia ka jingleh Niam Behdeiñkhlam, ula ong u Sari.

Ha kane ka jingleh niam la wan rah da u Syiar bad ka Blang bad u Langdoh un pyndep ia kane ka jingleh Niam Knia ha ryngkat ka jingiadonlang ki Waheh Sankur Sankmai ki saikhrong sai kynsha kiba hap hapoh ka Seiñriij Mukhla.

Mynta ka kynti haduh 31 tylli ki Syiar Ryngkuh bad ki Blang Shynrang 8 tylli kiba u Langdoh u pyndep ia ka leh Niam Knia hapoh ka Duwan dupat hapoh ka khlaw kyntang ka Seiñraij Mukhla.

La sdang ia ka jinglehniam naduh ka por step mynta ka sngi na iung ka Langdoh iung Blai bad la leit Knia shapoh Duwan dupat ha khlaw kyntang.