Pyndep ka Raij Jowai ïaka lehniam Kñia Khang

Syllad | The Rising MeghalayaJune 20, 2022

Kumba ki sngi ki taiew jong ka Shad Niam Behdeiñkhlam hapoh ka Raij Jowai ki la jan poi kumta ki nongsharai niam ka Raij naduh u Dolloi, Pator, Langdoh, Sangot bad ki Wasan ki la iabun kam ha ka ban pyndep ia ki jinglehñiam ne knia ainguh bapher kiba long katkum ki adong adit niam ba ladep buh ryntih naduh ba sdang ka Raij ka Shnong.

Ha kane ka taiew kawei na ki jinglehniam ba la pyndep ka dei ka Kñia Khang kaba long ka jingknia ainguh aidem ia ki Blei Shnong Blei Raij kiba ieng ban ker bad iada ia ka shnong ka raij na ka sniew ka smeh, ka tyrut ka smer kiba wan ha ki rukom bapher kiba kynthup ia u Mookhai, Mooralong, Moosniang, Mootong ryngkat bad ka Syiem Myntdu balong ka wah ba ker talaeiar ia ka shnong Jwai.

Ha ki lai sngi jong kane ka jinglehniam naduh ka 18 tarik haduh 20 tarik Jylliew (June) ki shakri niam Ka Raij naduh u Dolloi, Pator, Langdoh, Sangot, ki Wasan bad ki kni na ki Phrakur Phrakmai ki don ka bynta ba kyrpang ban pyndep kum ha ka ban iashimbynta haka Dihsoopen ha iing Langdoh, ka Kbai Mooknor ha Iawmusiang.

Mynta ka step la pyndep ia ka jingknia ainguh aidem na ka bynta ki Soodwar Sooluti bad ka Tawiar Takan.