Pyndep ka Raij Jowai ia ka kñia ai nguh ba shisien shisnem ia u Syiem Pyrthat

Syllad | The Rising MeghalayaJune 23, 2024

Kumba ka jingpynkhreh ia ka shad niam Behdieñkhlam hapoh ka Raij Jowai ka la iaid shait shait shakhmat ha kaba ki khun ka niamtre nadooh ki dong ki shnong bad ki longïing ba iadonbynta ha kum kane ka por ki la ia bun kam naduh ka jingpynkhreh ia ki Rot bad kiwei ki rukom leh niam.

Ha ka 23 tarik Jylliew ki shakri niam ka Raij Jowai naduh u Dolloi, u Pator, ki Sangot, ki Wasan, ki kni jong ki Phra Kur Phra Kmai ryngkat ka jigiadonbyntalang ki Soo Langdoh bad ki Kni naman ki longing jong ki khun ka Niamtre ki la ia leit sha Loom Mookhai ban pyndep ia ka lehniam knia ainguh aidem ba shisien shisnem ia u Syiem Pyrthat bad ia u Mon Ryngklaw.

Ha kane ka step shwa ban mih na iing Langdoh, u Dolloi, Pator, Langdoh, ki Sangot ryngkat ki shakri niam ka Raij Jowai kin hap ban peit bad bishar ia ki dak ki shin ba paw ha ki lai tylli ki Kpu Niam ba la shet kyrpang da ka Langdoh, kiba long na ka bynta ka Raij ka shnong, na ka bynta u Doloi bad na ka bynta U Langdoh-ka Langdoh.

Hakhmat ka duwan ia kane ka jingknia ainguh la pyndep da u Sangot Paswet ha ryngkat ka jingsynranlang u Sangot Pasubon bad u Sangot Pakyntein kiba long ki pateng khun pateng ksiew ka kur Sookpoh Khat-ar Wyrnai.

U Doloi ka Elaka Jowai Waheh Puramon Kynjing haba ia kren u la iathuh ba kane ka dei kawei na ki jinglehniam ha kaba nalor ki khun ka Raij Jowai lawan ban iadonbyntalang ruh da kiwei ki Raij kum na Raij Chyrmang, Tuber bad Ialong bad kane ka jinglehniam ka long kyrpang ban ai nguh ai dem ia u Syiem Pyrthat bad ia u Mon Ryngklaw.

Bad ka jinglah ka Raij Jowai ryngkat ki Soo Langdoh bad pyndep ia kane ka lehniam kan kum ba la buh kan long ka jingkyrkhu bakhraw ia baraoh ki khun ka Raij ka Shnong kumjuh ia ka ri bad ka jaitbynriew ha ka nongrim jong ka Tipbriew-Tip Blei bad Kamai iaka Hok.