Pyndep ka Raid Jowai iaka lehniam Thoh Langdoh, khein kor iaki jingkyrkhu ka mariang; ong u Dolloi Puramon

Syllad | The Rising MeghalayaMarch 20, 2025

Ka Raij Jowai kumba ju long man la u snem mynta ka 19 tarik Lber, hapoh ka jingpeit jingpyniaid u Dolloi kum u khlieh ka niam bad elaka ryngkat ki shakri niam, ki Phra Kur Phra Kmai, ki riew rangbah bad ki khun samla ka Seinraij, Jowai ki la shim ban pyndep ia ka lehniam Thoh Langdoh hakhmat ka duwan pyndep niam ba don ha Khloo Langdoh.

Kane ka jinglehniam ka long shibynta ban ainguh aidem ia u Lei Langdoh na ka bynta ki jingkyrkhu ba la ioh bad ruh ka long shibynta ka jingpynkyntang ki khun ka Raid ia ka Mei mariang kaba la theh sei ki jingkyrkhu ia u khun bynriew ha baroh ki liang.

Ia kane jinglehniam ne knia ainguh hakhmat ka duwan u Moo Langdoh la pyndep da u Sangot Paswet ha ryngkat ka jingsynranlang u Sangot Pakyntein bad u Sangot Pasubon kiba dei ki lai Sangot jong ka pateng khun pateng ksiew ka Kur Sookpoh Khatar Wyrnai.

Nalor ka jinglehniam ha kane ka sngi, ha ka jingpyniaid u Pator kum u shongknor la pynlong ruh ia ka Dorbar Niam ha kaba la iashimbynta da ki kñi, ki riew rangbah bad ki khun samla ka Seinraij bad ka mat ba la ia kren iatai kyrpang ha kane ka sngi ka long halor ka nongrim ban pynjanai ia ki kam niam kiba iadei ha la ki iing I sem bad ha ka Raij ka Shnong.

Na ka liang u Dolloi Puramon Kynjing haba iakren u la iathuh ba ka nongrim jong ka jingpyndep niam ha kane ka sngi ka long ba ki khun ka Raij ka shnong ki pyni ka jingburom bad kheinkor ia ka Mei mariang kaba la theh sei ki jingkyrkhu ia u khun bynriew ha baroh ki liang bad ha kane ka sngi kat kum ka adong niam ki khun ka Raid kim bit ban trei ban ktah ne ban leh kino kino ki kam da kaba pynjot bad pynsniewdur ia ka mei mariang bad ki sawdong sawkun jong ka.

Ula kitbok kitrwiang bad ai ai mynseim ia baroh ki khun ka Raid, ka Elaka bad ka jaitbynriew ba kumba ka Raid Jowai ka lah ban pyndep ia kane ka jinglehniam hapdeng ka jingshongkun shongblei, u khmih lynti ba ka jingpyndep ia kiwei ki kam niam hapoh ka Raid ka Elaka ha ka nongrim jong ka shad niam Behdieñkhlam kin long kiba iaidbeit iaidryntih.