Pyndep ka Raid Jowai iaka jinglehniam Kñia Pyrthat

Syllad | The Rising MeghalayaJuly 5, 2025

Ki khun ka Niamtre hapoh ka Raid Jowai ryngkat ka jingiadon bynta lang ki shakri niam ka Raid Chyrmang, Tuber bad Ialong ki la pyndep ia ka lehniam knia ban ainguh aidem ba shisien shisnem ia u Syiem Pyrthat ha ka duwan knia ba don ha Loom Mookhai haka 4 tarik Naitung.

Ha kane ka step shwa ban mih na iing Langdoh ka la don ka lehniam peit ‘Tpu’ ba la shet da ka Langdoh ha kaba u Dolloi, u Pator, u Langdoh, ki Sangot ryngkat ki shakri niam ka Raid Jowai kin peit bad bishar ia ki dak ki shin ba paw ha ki lai tylli ki Tpu Niam kiba long ka dak ka sakhi blei ban pyni ha ka jingiadei bad ka rukom treikam ka raij ka shnong, u Doloi bad u Langdoh-ka Langdoh.

Hakhmat ka duwan ia kane ka jingknia ainguh la pyndep da u Sangot Paswet ha ryngkat ka jingsynranlang u Sangot Pasubon bad u Sangot Pakyntein kiba long ki pateng khun pateng ksiew ka kur Sookpoh Khat-ar Wyrnai.

U Doloi ka Elaka Jowai Ma Puramon Kynjing haba ai jingkren ha ka jingiadei bad ka lehniam Knia Pyrthat u la iathuh ba kane ka dei kawei na ki jinglehniam ha kaba ki Soo Langdoh ba kynthup ia u Langdoh Kongwasan Chyrmang, Langdoh Tuber, Langdoh Ialong bad Langdoh Jowai ki shim ban pyndep ia kane ka lehniam kyrpang ban ai nguh ai dem ia u Syiem Pyrthat bad ia u Mon Ryngklaw.

Shuh shuh u Dolloi kum u khlieh ka niam khlieh ka Elaka u pynpaw ka jingsngewnguh sngew burom ia ki shakri niam ki Soo Langdoh bad u khmih lynti ruh ba kumba ki dak ki shin ki pyni ia ka jingmiat jingbha ka jinglehniam, u don ruh ka jingkyrmen ba U Blei Nongbuh Nongthaw un iai theh sei ki jingkyrkhu na ka bynta ka miat bha, ka roi ka par bad ka shongsuk shongsain ka shong ka raij bad ka ri ka muluk.