Pyndep ka MBS&G West Jaintia Hills ïaka Rajya Puraskar Testing Camp

Syllad | The Rising MeghalayaOctober 26, 2021

Ka Meghalaya Bharat Scouts & Guides (MBSG), West Jaintia Hills District kum shibynta ban pyni ïaka jinglah bad jingtbit jong ki khynnah Scouts Guides ha ki rukom bapher, ha ka 26 tarik Risaw 2021 ka la pynlong ïaka Rajya Puraskar Testing Camp ha District Headquarter, Jowai.

Kane ka Testing Camp ka long kawei na ki rukom ba dei ban leh ne pyndep man la u snem da ki bor pynïaid jong ka Scouts Guides Movement ba don ha kylleng ki Jylla ka Ri India bad lyngba kum kine ki Testing Camp ki bor pynïaid ki lah ban tip ïaka jinglah bad jingtbit jong ki khynnah na ka bynta ba kin lah ban pynkup ha ki ïaki kyrdan kiba la tip kum ka Rajya Puraskar Award ne Governor Award bad Rashtrapati Award ne President Award.

Ha kane ka Testing Camp mynta u snem la don kumba 14 ngut ki khynnah kynthup 5 ngut ki Scouts bad 9 ngut ki Guides na ki ar tylli ki skul ba kynthup ïaka Church of God Secondary School, Ummulong bad ka Marian Hills Higher Secondary School, Jowai bad ïa kane ka Testing Camp la shim ti ban peit bad pynïaid da ki briew ka Meghalaya Bharat Scouts & Guides, State Headquarter Shillong kiba kynthup ïa u Benharmaryo Myrthong, State Organising Commissioner Scouts, u Khrawkupar Ïawphniaw, Staff State Headquarter Shillong, ka Catherine Nongkseh, State Organisng Commissioner Guides bad ka Matilda Lyngdoh, Assistant State Training Commissioner Guides ha ryngkat ka jingïadonlang ka Siami Shylla, District Organiser Guides, u Elvis Dkhar, District Organiser Scouts, u Ohiwot Laloo, District Secretary MBS&G West Jaintia Hills, u Teiborlang Rymbai, Scouts Master, ka Niwan Khynriam, Guide Captain Church of God Secondary School, Ummulong bad ka Grecarisa Sana, Guide Captain, Lissi Pearl Secondary School, Mukhla.

Ki bynta bad ki rukom kiba la shim ban peit bad iitbniah ïaka jinglah jong ki khynnah ha kane ka Rajya Puraskar Testing Camp ki long ha ki rukom bapher ba kynthup ïaki Knoting & Lashing, First Aid, Compass, Estimation bad kiwei kiwei kiba ïadei bad ka rukom im jong ki khynnah Scouts-Guides.