Pynbna u CM ia ka nongrim ba khlain ban iakhun ia ka thma pyrshah drok ha ka Jylla da ka jingiatreilang
U Myntri Rangbah ka Jylla u Conrad K Sangma haka sngi Palei u la buh ia ka nongrim kaba khlain bad ka jingkut jingmut kaba skhem ha ka jingiakhun ia ka thma pyrshah dork ha ka Jylla da kaba pyllait paidbah ia ki mat treikam kiba bniah bad iohi jngai haba iashim bynta ha ka jingrakhe ia ka ‘International Day Against Drug Abuse & Illicit Trafficking.’
Ha kane ka jingrakhe ba la pynlong hapoh State Convention Centre khot lyngba ka Tnad Social Welfare ha ryngkat ka jingiatreilang bad ka Meghalaya Police, Meghalaya AIDS Control Society bad ka Drug Reduction, Elimination and Action Mission (DREAM) la sakhi ia ka jingiadon lang ruh ki nongialam na ka liang ka Tnad ka koit ka khiah bad ki nongialam shnong halor ka phang “Breaking the Chains: Prevention, Treatment and Recovery for All.”
Ha ka jingkren u Myntri Rangbah u la ban jur ruh ba na ka liang ka sorkar ka kut jingmut skhem ym tang ban pyntreikam ia ki ain hynrei na ka bynta ka jingpynbha pat kaba pura namar ka dei kaba ktah ia ka koit ka khiah, ka imlang sahlang bad ia ki mat kiba iadei bad ka roi ka par. Ka DREAM ka dei ka thong ka jong ngi ban ieng iakhun ryngkat lang ia kane ka jingeh, kum ka jylla bad kum ki nongshong shnong.
U la pynpaw ruh halor ka jingjop jong ka jylla ha ka jingpyntreikam ia ki kyndon ain da kaba kdew ba tang ha kine ki laisnem ba la dep, ki bor pulit ka jylla ki la ioh ban kurup ia ki jingdih pynbuaid kiba kot haduh palat T.1,000 klur, kata kynthup naduh u heroin, kynja, opium bad crystal meth. Haduh 1,031 tylli ki case drok la ujor bad palat 422 tylli la dep ban chargesheet. Ka sorkar ka la thaw ruh ia ka kynhun treikam ba kyrpang, ka Anti-Narcotics Task Force (ANTF), bad la pyntreikam ruh ia ki tiar bad ki kor ki bor bathymmai jong ka juk kum ka drug scanner bad ka kynhun ki ksew sma dien ba la ioh jinghikai pyntbit.
U Conrad u kyntu ruh ia ki nongshong shnong, ki nonghikai, ki nongialam shnong, ki sengbhalang bad ki longiing longsem ba kin mih shakhmat ban iashim bynta lang ha kane ka jingiakhuh pyrshah ia u drok.
Hashwa ban pynkut ia ka jingkren u Myntri Rangbah ula ialam ruh ia ka jingshim smai kum shibynta jong ka National Nasha Mukh Bharat Abhiyan.
Katba u Myntri ka Tnad Social Welfare u Bah Paul Lyngdoh ha ka jingkren u la pynskhem ia ki sienjam bapher bapher ba la shim da ka sorkar ha kane ka thma pyrshah drok. U la pyrto ruh ia ki bor pulit ka jylla kiba la aiti pura ia ka Tnad ANTF tang ha ka kam iakhun pyrshah drok, bad pynpaw ruh halor ka jingwanrah ia ki kyndon ki ban iada bad pyrkhing hapoh ka NDPS Act pyrshah ia kito ki nongkhaii drok kiba dang iai bteng ban leh ia kane ka kam bymman.
Haba khot ia ka jingiatylli hapdeng ki nongshong shnong, u la ong, “Ngi donkam ia man la ka Ward bad man la ki Dorbar Shnong ban long ki jaka pdeng jong ka jingpeitngor bad ka mynsiem leh isynei.Kane ka jingialeh kam dei ‘mangi pyrshah ia ki’ hynrei ka dei ‘ma ngi baroh pyrshah ia u drok.’
Ka bynta kaba sngew myllung bad kaba ktah ha kane ka prokram ka dei ka jingkren bad ka jingphla ia la ka jingshem da u Isaac Surong u samla uba la ioh pat ia ka jingjop ha ka jingiakhun pyrshah ia ka jingkyrni ha u drok naduh ba u dang khynnah. U la pynkynmaw kumno ba u la ngop ha u drok heroin bad ioh biang ia ka jingim kaba thymmai lyngba ka jingngeit, ka jingkyrshan bad ka jingsumar.
Ha kane ka sngi la leh burom ruh ia ki palat 20 ngut kiba la ioh lait noh pura na u drok (Recovery champion) kiba long kum ki sharak ka jingkyrmen hapoh ki shnong ki thaw bad ka imlang ka sahlang jong ki.
La pynkut ia kane ka jingrakhe da ka jingpynkup burom ia ki nongjop ha ki jingiakop bapher bapher ki ba ialap pyrshah ia u droks kum ka lympung ialehkai phutbol, basketball, ka cycle rally, ka rynsan iaput iatem bad kiwei kiwei.
Facebook
Instagram
Youtube
Twitter
Leave a Reply