Pynbna u CM ban tei ia ka Handicraft Training Centre ha Tangmang; pyrto ia ka sap thain kti

Syllad | The Rising MeghalayaMay 18, 2025

U Myntri Rangbah ka Jylla u Conrad K Sangma ha ka sien kaba nyngkong eh u la leit ban iuhkjat ha ka shnong Tangmang kaba pawkhmat ha ki kam shna bad thain kti kaba hap hapoh Pynursla Civil Sub Division, East Khasi Hills haka 17 tarik Jymmang. Ha kane ka sngi u la pynbna ban tei ia ka Handicraft Training Centre bad ban kyntiew ia ka roi ka par jong ka thain.

Ka shnong Tangmang ka dei kaba la tip kum ka shnong kaba la don palat ar spah snem ia kaba la seng da ki briew kiba wad jaka rieh hadien ka jingkhynniuh jong u jumai bah.

Ka jingbna nam halor ka jingitynnad jong ki sawdong sawkun bad kaba dap da ki kshaid bad ki wah kiba tuid sha ki jaka them jong ka Bangladesh, ka Tangmang ka dei ruh ka thain kaba ia tip bha halor ka jingpynmih ia ki tiar ki tar ba la shna na ki siej bad ha ki kam thain jain.

Ha kane ka jingleit jurip la pdiang sngewbha ia u Myntri Rangbah da ki paidbah nongshong shnong kiba la pyni ruh ia ki tiar ki tar thain kti jong ki ia kiba la shna na ki siej khamtam u shylliah.

Haba pyrto ia ki sap ki phong jong ki nongshna bad nongthain kti jong kane ka shnong, u Conrad u la bthah ia ki ophisar ba kin thied ia bun bah ki mar ba la pynmih na kane ka shnong khnang ban ai sngewbha sha ki heh sorkar kiba na shabar kiba wan iuhkjat sha kane ka jylla.

“Kane ka dei ka jingwan jngoh ka ban sah jingmynmaw,” u la ong. “Kum ka sorkar ngi ngeit skhem ba ka roi ka par ka dei ban long lang ia baroh. Haba ngi bei tyngka na ka bynta ki jingtei kiba heh, ngi dei ruh ban pyntreikam ia ki prokram bapher bapher ki ban kyntiew beit beit ia ka jinglong jingim jong ki nongshong shnong.”

T.70 klur mang ka Sorkar ban tei ia ka experience centre ki jingkieng jri ha Wahlyngkhat, musical centre ha Wahkhen

Haba pynpaw ia ka jingkut jingmut jong ka sorkar ban kyntiew ia ka roi ka par ha ki thain nongkyndong lyngba ki kam bapher bapher, u Myntri Rangbah u la ong, “Ka jingkyrshan ia ki nongshna bad nongthain kti bad thain jain ka dei ka thong ba hakhmat eh jong ka sorkar MDA. Lyngba ki skhim bapher bapher kynthup ka jingkyrshan ia ki Self Help Groups (SHG) bad ki Village Organisation, ngi don ka jingangnud ban pynkupbor ia ki nongshong shnong bad ban kyntiew ia ka kamai kajih ka jong ki.”

Nalor kata u la pynbna ruh ban tei ia ka Handicraft Training Centre ha ka shnong Tangmang ka ban kynthup ia ki jingtei kiba katkum kane ka juk ba mynta, ki kor ki bor bad ki jaka sah na ka bynta ki nongwan shah hikai lyngba ki riew donsap ha ki kam shna bad thain kti ha kane ka shnong.

U Conrad u la pynshlur ruh ia ki nongshong shnong ban nangkyntiew ha kaba iadei bad ka jingpynmih ia ki mar, ban nangpynbha shuh shuh ia ki tiar ba la pynmih bad ban wad ia ki iew shabar jong ka jylla ban pynpaw ia ka sap ka phong ka jong ki.

Ha kane ka jingleit jurip, u Myntri Rangbah u la pynlong ruh ia ka CM Connect ban iakren markhmat bad ki nongshong shnong ban sngap ruh ia ki jingsngewkhia bad ki jingeh kiba ki iakynduh.

Haba jubab ia ka jingkyrpad na uwei u khynnah skul, u Conrad u la kular ban mang pisa na ka bynta ban tei ia ka iingskul kaba thymmai jong ka Tangmang Secondary School lyngba ka Chief Minister Special Development Fund.