Pynbna ka SSA ban sdang noh ïaka lympung ïalehkai football U-20 bad 4th Division

Syllad | The Rising MeghalayaSeptember 8, 2021

Ka Shillong Sports Association (SSA) kala pynbna paidbah ba naduh 2 tarik u bnai Risaw kan sdang noh iaka lympung ïalehkai football haka U-20 bad ka 4th Division Football Tournament ha madan ialehkai jong ka Second Ground Polo.

U Hony Secretary ka SSA u bah S.S Rapthap, u ïathuh ba ka SSA ka la shong jingïalang haka 28 tarik u Nailar bad ha kane ka jingïalang, ka rai ba la shim ka long ban phah sha ka Tournament Committee ba kan pyndep ïa ki kam kiba donkam baroh, bad dei ha ka 4 tarik jong ka taïew kaba la dep, ba ka Tournament Committee ka la pyntip ba kan sdang shwa ban pynlong da kane ka lympung.

U Bah Rapthap u ïathuh ba ka rai ban pynlong ia kane ka lympung ka long ba man la ki kynhun ban ïashim bynta kin hap ba kin da bud ryntih ïa ki kyndon kat kumba la dep ban pruid dak da ki bor synshar jong ka district khamtam lei lei haba ïadei bad ka jingpyndep ban ai ïa ka tika ne ka Covid 19 Vacination ïa man la ki player ba la register ban ïashim bynta ha kane ka lympung ïalehkai.

Ha kane ka kynti yn don broh 16 tylli ki kynhun ban ïashim bynta, ïa kaba la phiah ïa ki ha ki ar bynta ne group.

Haba ïadei bad kiwei kiwei pat ki kyrdan ïakhun jong ki lympung kum ka Third, Second First bad Super Division, u bah Rapthap ula ïathuh ba mynta ym pat lah ban kren ne ong eiei hynrei ka SSA hi kan sa shim ïa ka rai ha ka por kaba biang ïa kine baroh.