Pynbna ka Sorkar iaka rai ban siew hi noh iaka tulop ki District Council

Syllad | The Rising MeghalayaAugust 26, 2025

U Myntri Rangbah ka Jylla u Conrad K Sangma ha ka 25 tarik Nailar u pyntip ba ka sorkar Jylla ka la shim ia ka rai ban siew hi noh ia ka tulop sha ki nongtrei jong ki lai tylli ki District Council ha ka Jylla ka ban sdang treikam naduh ka 1 tarik u Naiwieng 2025.

Ia kane ka rai la shim hadien ka jingiamir jingmut kaba bniah bad ki nongialam ka Garo Hills Autonomous District Council (GHADC) lem bad u Lat ka Jylla.

U Myntri Rangbah u la ong ba ka GHADC kala iakynduh jingeh shibun ban siew ia ki tulop jong ki nongtrei namar ka jingduna ha ka jingpynmih pisa. U la ong ba ka GHADC ka donkam haduh palat T.70 klur shi snem na ka bynta ka jingsiew tulop katba ka jingpynmih pisa kam kot wat tang T.30 klur. U la ong kane ka jingeh ka long kumjuh ha kiwei pat ki ADC, kata ha JHADC bad katto katne ha KHADC.

Da kaba pynpaw ba ki ADC ki dei ki bor treikam ba kongsan hapoh ka jylla bad ki dak jong ka kolshor bad ki jingleh jingkam tynrai, u Conrad u la ong, “Kumta ka long kaba donkam ia ka sorkar Jylla ba kan pynthikna ba ym tang ba ki Council kin treikam bha, hynrei kin roi bad pynthikna ruh ba kan lah ban khmih bad pyniaid ki bynta bapher bapher kiba iadei bad ki riti dustur jong ngi, ka kolshor jong ngi bad halor ka rukom bat khyndew.”

“Da kaba pynleit jingmut halor kine ki bynta, ngi kum ka sorkar ngi la rai ba naduh ka 1 tarik Naiwieng na ka liang ka sorkar Meghalaya kan siew hi noh ia ka tulop na ka bynta ki District Council bapher bapher ha ka Jylla,” u la pynbna.

Da kaba shim ia kane kum ka khyllipmant ka ban sah jingmynmaw, u Myntri Rangbah u la ong, “Shisien ba la siew ia ka tulop ki District Council kin lah ban pynleit jingmut sha kiwei pat ki kam ba kongsan bad halor ka roi ka par bad ki bynta kiba iadei bad ka kolshor ki jingleh jingkam tynrai.”

U la ong ruh khnang ban pynthikna halor ka jingpyntreikam bha ia kane ka rai, ka sorkar kan sa thaw ruh ia ka Committee ka ban iakren iamir jingmut bad baroh ki laitylli ki  Council, kata ka KHADC, JHADC bad GHADC.

“Kane ka Committee kan shim por 45 sngi ban pynthikna ba kan iakren iapynbeit bad baroh ki Council bad ban pynthikna ba kane ka jingpynbeit kan long kaba paka khnang ban siew ia ka tulop sha ki ADC da ka sorkar Jylla,” u la ong da kaba bynrap ba kan ym don satia kano kano ka jingtuklar ia ki jingtreikam ba man ka sngi lane ia u pud u sam jong ki District Council.

“Ka jingthmu jong ngi ka long beit tang ban wanrah ia ka jingshngain ha ka liang ka pisa tyngka jong ki Council khnang ba kin lah ban siew ia ka tulop ki nongtrei ha ka por kaba dei bad khnang ba kin lah ban bteng ia ki jingtreikam bad ban trei katkum ki kyndon ba la buh da ka Riti Synshar jong ka Ri,” u la ong.

Nalor kata u Conrad u pyntip ruh ba u la iakynduh ia u Lat ka jylla u CH Vijayashankar bad pynsngew ha u ha kaba iadei bad kane ka rai ba la shim da ka sorkar.

“Nga la shim ia ki jingbthah bad ki jingkdew lynti jong u Lat bad katkum ka jingbthah jong u, ia kine ki rai yn sa pynskhem da ka jingialang jong ka Kynhun Myntri ka ban long ha ka 26 tarik Nailar,” u la bynrap.