Pynbha ki samla ialehkai ka Jylla iala ka jong ka rekod haka Khelo India

Syllad | The Rising MeghalayaJanuary 16, 2020

SHILLONG: Ka kynhun jong ki rang bad ki thei ialehkai athletic jong ka jylla, kampher wat lada kim shym la lah satia ba kin ioh ba kin khur ia la ki jong ki takma, pynban ka khubor lam sngewtynnad na kane ka kynhun ka long ba kiba bun ki la lah ban pynpra ia la ki jong rekod (record) kaba ki la lah ba kin thaw ha la ka jingim ialehkai ka jong ki, ha ka lympung ialehkai jong ka 3’rd Khelo India Youth Games kaba la long ha sorbah Guwahati.

Haba iakren bad ka coach jong kane ka kynhun ialehkai ka kong Daicy Marwein jong ka tnat Sports & Youth Affairs ka pynpaw ba ka jingioh ban iashim bynta jong ki khynnah ka long kaba pynhun ia ka kum ka coach, namar ba ki la pynpaw ia ka mynsiem trei shitom bad ba ki la sdang ban kynjoh sha ka rta ialehkai kaba pura ha ka jingim ka jong ki.

Ki samla ialehkai kiba la lah ban pynpra ia la ki rekod ka jong ki ha kane ka lympung bah ialehkai ki khun samla jong ka ri ki long kum u Skhemlang  Suba mynta ka kynti u la pynpra ia la ka jong ka rekod kaba ula dep ban thaw mynba ba u la ialehkai ha ka School Games ba la long ha Punjab ha kaba u la lah ba un pyndep ia ka thong ha ka 4:05 sekon hynrei ha Guwahati u la lah ban kham pynbha shuh shuh ia la ka rekod da kaba u la pyndep ia ka thong ha ka 4:03 sekon bad ban bat ia ka kyrdan kaba hynriew.

Na ka liang ka jong u Masro Kyndait (U-21) 1500mts, ka jinghiar iashim bynta ka jong u sha kane ka lympung ialehkai ka lam sniew bok namar  ba u la kem pang jyrhoh naduh ka sngi ba u la mih lang bad ka kynhun na ka nongbah ba la bynrap lang bd ka baiong khlieh, lymda kine ki jingpang ne shitom kim shym la ban satia ha ka met ka jong u, un jin da la lah ba un ioh ba un bat ia ka kyrdan kaba lai, ka rekod kaba u la bat ha ka jingim ka long 4:04 sekon bad ha Guwahati pat ka la lam sha kaba kham sniew hadien ba u la pynep ia ka thong ha ka 4:08 sekon.

Kiwei kiwei pat ki  nongialehkai kum ki jong ka Gloryfy Kurbah (U-21) 800mts bad kan bat ia ka kyrdan kaba hynniew, ka Anjelina Jackson (U-17) 400 mts, u Ribet Dkhar (U-21) 1500 mtr u la lah ban bat ia ka kyrdan kaba hynriew.  Haba phai pat sha ki bynta jong ka Jump, ki nong ialehkai kum ki jong u Primus Ronghi (8’th Position) , Ladin Penang (10’th position) bad Rinalis Ingti kiba iakhun ha ka kyrdan ka U-17, ki la shu lah shwa tang ba kin iai neh ha la ka jong ka rekod ba ki dang bat ha la ka jingim ialehkai ka jong ki.