Pynbeit thymmai ka ophis u SP-WJH halor ka leit ka wan ki kali ha sor Jowai

Syllad | The Rising MeghalayaNovember 3, 2023

Na ka bynta ka jingshngain bad ka jingkylluid ha ka leit ka wan, na ka liang ka ophis u Superintendent of Police kla West Jaintia Hills District ka la pynbeit thymmai ha kaba iadei bad ka rukom leit rukom wan jong ki kali kum ka jingpyrshang.

Katkum kane ka jingpynbeit bathymmai ka lynti surok napoh DC Point shapoh Presbyterian Church (Mission Compound) mynta yn pyntreikam kum ka lynti shibeit ne ka one way route.

La khang pyrshah ia ki kali kiba thmu ban rung shapoh Iawmusiang napoh ka lynti na Presbyterian Church Junction (Mission Compound). Hynrei watla katta ia ki kali kiba wan na ka thain Iongpiah, Dulong, Lumingkjam bad kiwei pat ki jaka yn pynkynriah noh ba kin iaid lyngba na ka surok Chutwakhu.

Ka lynti surok na Chutwakhu kaba lam shapoh Meghalaya Studio hajan Seinraij Parking Lot la pynkylla kum ka jaka rung, kata kum ka surok shibeit ne one way.

Ia kine ki jingpynkylla yn pyntreikam kum ka jingpyrshang ka ban sdang naduh ka 6 tarik mynta u bnai.

Shuh shuh la pynlong ruh iaka jingialang bad iaka jingleit jurip da ka ophis u Superintendent of Police, West Jaintia Hills bad ki nongmihkhmat trai shnong napoh Iawmusiang bad Mission Compound (Pohshnong) ban pynjem iaka jingkhappngiah ka leit ka wan ha ka byna jong ka Iawmusiang.

Nalor kata la pyntreikam ruh ia ka policy kaba khang pyrshah ia ka jingwan rung ki kali heh naduh ka por 7 baje mynstep haduh ka por 8 baje mynmiet. Baroh ki kali (Medium vehicles) bad kali rit kaba kynthup ia ki mini trok, bolero pickup bad kiwei pat ki kali kit mar kiba wan ban kiar bad pynhiar ia ki mar ki mata, la khang pyrshah ba kin pynlong jaka ieng hapoh Iawmusiang bad Mission Compound hashwa jong ka por 8 baje mynstep haduh por 7 baje mynmiet. Baroh ki kali pynhap mar ki dei ban pynhiar ne kit mar hapoh 8 baje mynstep bad hadien ka 7 baje mynmiet.

Lada jia ki kam kiba kyrkieh kiba donkam ia ki kali ba kin pynieng ha kine ki jaka, ki dei ban ioh ia ka jingbit na ka ophis u Superintendent of Police, WJH.

Kino kino ki jingpynkhein ia kane ka jingpynbeit kin ngat ha ka jingshah dain kuna katkum ki kyndon jong ka MV Act 2019.