Pyllait u Myntri Rangbah ia ka yacht ‘Meghalinor’ kaba nyngkong eh ha pung Umiam

Syllad | The Rising MeghalayaJune 5, 2025

U Myntri Rangbah ka Jylla u Conrad K Sangma haka 4 tarik Jylliew u la pyllait paidbah ia ka yacht ne ka lieng kaba la ai kyrteng ‘Meghalinor’ kaba nyngkong eh ha ka jylla hapoh ka pung Umiam.

Ha kane ka prokram la ia don lang u Myntri ka tnad Tourism u Bah Paul Lyngdoh, u Commissioner & Secretary Tourism u Vijay Kumar D, u Director ka tnad Tourism u Bah CV Diengdoh bad kiwei kiwei.

Haba kren ha ka jingialang u Myntri Rangbah u la ong ba ka jingpyllait ia kane ka Yatch ka long kaba don jingmut namar ka wanrah lang ia ka jingpyniasoh ia ki artylli ki bynta ba kongsan jong ka sorkar, kata ka kam jngohkai bad ka kam ialehkai sports ka ban wanrah ia ka jingktah ka ba khraw.

“La ka dei ka kam jngohkai ne ka kam ialehkai sports, ngi don ia ki jingthmu bad ka thong bad ruh ka jingiohi kaba kham jngai ban thaw ia ki lad kamai kajih bad ai kam ai jam da kaba phaikhmat kyrpang sha ki samla halor kaei kaba ngi leh, bad kane ka prokram mynta ka sngi ka dei kaba pyniasoh lang ia kine baroh,” u la bynrap.

U la bynrap ba namar haduh 50% na ki nongshong shnong ka Meghalaya ki dei kiba hapoh ka 20 snem rta, kumta ruh na ka liang ka sorkar kan hap ban pyrkhat janai ha ka ban pynbit pynbiang ia ki jingdonkam jong kine ki samla bad ong, “Ngi hap ban buh ia ka nongrim na ka bynta jong ki khnang ba ngin lah ban pynioh ha ki ia ki lad ki kabu ha ki snem ki ban wan.”

Nalor kata u la ong ba ka pung Umiam kam pat shym la ioh ia ki lad ki kabu kiba pura bad ba na ka liang ka sorkar ka la sdang ia ki sienjam bapher bapher kum ka Water sports ne ki jingialehkai ha um, ki jingiakop king lieng ha pung Umiam nalor ka jingkyntiew ha kaba iadei bad ki jingtei ban pynlong ia ka pung Umiam kum kawei na ki resort kaba biang tam ha ka thain lammihngi jong ka ri.

“Kane ka sienjam kaba rit hynrei kaba kongsan mynta ka sngi kan pynbha ia ka jingiakynduh baroh kawei hapdeng ki nongwan shangkai ki jong ngi, hynrei kane ka dei tang ka jingsdang,” u la ong.

Haba pynpaw halor ka jingkongsan jong ka pung Umiam kum ka jaka kaba paka ban pynlong ia ki water sports, u Myntri Rangbah u la ong ba ka pung Umiam kaba don ia ki sawdong sawkun kaba itynnad yn lah ban nangkynriew shuh shuh ha kine ki jait jingialehkai sports.

Haba ai ka jingiaroh ia ki nongialehkai kiba la wanrah ia ka nam ka burom ia ka jylla ha ka National Games kaba la dep ha ka jingiakop Kayaking bad Canoeing, u la bynrap ba ka pung Umiam ka lah ban long ka jaka pdeng na ka bynta ki jingialehkai water sports ha ka jylla.