Pyllait u Lat ia ka kali ialap pyrshah drok ha ka Jylla; pyrto ia ki sienjam ba la shim da ka sorkar

Syllad | The Rising MeghalayaMay 14, 2025

U Lat ka Jylla u CH Vijayashankar haka 13 tarik Jymmang u la ong ba ki jingkyrni ha u drok ki la ktah jur ym tang ia ki briew shimet hynrei ia ka koit ka khiah jong ki longiing longsem jong ngi, ia ki samla bad ia ka imlang ka sahlang.

Ha ka jingkren ha ka awareness programme halor ka jingpyndonkam drok ba la pynlong hapoh ka Nasha Mukt Bharat Abhiyaan ha Raj Bhavan, u Lat u la iaroh ia ka jingtrei shitom jong ki kynhun kiba iatreilang bad ka sorkar jylla ha ka jingiakhun ban pynlong ia ka jylla kaba lait na u drok.

Shwa kane u Lat u la kaweh ia ka lam ha ka bynta ka kali ialap paidbah lane ka Nasha Mukt Bharat Abhiyaan Awareness Vehicle na Raj Bhavan.

Kane ka kali ka long shibynta jong ka jingpynshai paidbah ha kylleng ka jylla kaba thmu ban pynphriang ia ki khubor ialap pyrshah drok ha ki skul, ki college bad ki shnong ki thaw.

Ia kane ka prokram la pynlong ha ryngkat ka jingiatreilang ka Raj Bhavan Meghalaya ha ryngkat ka Tnad Social welfare, Anti-Narcotics Task Force, Prajapita Brahma Kumaris Ishwariya Vishwa Vidyalaya, DREAM mission bad ka Rajyoga Education and Research Foundation.

Ha kane ka jingialang la sakhi ruh ia ka jingpynkular ban iakhun pyrshah ia u drok ha ka jingialam da ki dkhot jong ka Brahma Kumaris ha kaba baroh ki nongiashim bynta ki la kular ban kiar na ki jingdih kiba sniew bad ban pynpriang ia ki jingtip sha ki shnong ki thaw.

La ioh ruh ia ka jingkren na ka Brahma Kumari Sheela Didi kaba dei ka Chairperson jong ka Education Wing jong ka Rajyoga Education and Research Foundation, Mount Abu kaba la pynpaw halor ka bor na lade ban iakhun pyrshah ia ki jingdih pynbuaid bad ban im ia ka jingim kaba pyniabiang da kaba pynksan ba ki jinghikai ba pynshong nongrim ka long kaba kongsan ban lah ban tehlakam ia ki jingdih pynbuaid.

Nalor kata la ioh ruh ka jingkren na u Pravin Bakshi Commissioner & Secretary ka Tand Social Welfare, u Rangbah Shnong ka thain, u dkhot ka seng treimon sngewbha kiba la pynpaw halor ki sienjam ba la shim da ka sorkar bad ki jingeh ha ka jingiakhun pyrshah ia u drok ha kylleng ka jylla.

Na ka liang u nongmihkhmat na ka tnad Social Welfare u la iathuh lyngkot shaphang ka Projek DREAM, kaba shim ia ka buit treikam ba bun bynta kaba kynthup ia ka jingiada, ka jingsumar bad ka jingiatreilang bad ki paidbah ban rat dkhong ia drok.