Pyllait symbai dohkha ka kur Suchen ha pung Umhang, Bataw

Syllad | The Rising MeghalayaJuly 5, 2025

Ban pynroi ia ki doh um doh wah, ka Kur Suchen Bataw Unit kala pyllait symbai dohkha haduh 8 hajar tylli haka pung Umhang kaba don haka shnong Bataw. Kane ka pung um kadei kawei na ki pung um kaba heh ha rilum Jaintia kaba don iaka khana u barim.

Ia kine ki dohkha ka Kur Suchen ka aiti ha ka Seinraij Bataw ba kan pyllait ha kane ka pung.

Haka jingpyllait paidbah ia kine ki dohkha haka 3 tarik Naitung la wan ban sakhilang ruh da u nongialam jong ka KSU East Jaintia Hills District u samla Streamly Nongjop Suchen, haka jingdonlang u President bad Secretary jong ka Seinraij Bataw.

Nalorkata la donlang ruh u General Secretary Kur Suchen Bataw Unit Ma Teimonki Suchen Palong bad ki Dkhot ka Executive Committee jong ka Kur.

Ka Kur Suchen Bataw Unit ka pynpaw ka jingsngewnguh ia u Bah Hubert Kharbuki u Superintendent of Fisheries, East Jaintia Hills District halor ki kam pynshlur jong u ban pynneh pynsah ia ki dohum dohpnat ha District naroh kawei.