Pyllait paidbah u Nidamon Chullet iaki ticket lucky draw ka shnong Panaliar; ki khunsam T.11.5 lakh

Syllad | The Rising MeghalayaSeptember 7, 2025

Ka shnong Panaliar haka 6 tarik Nailur ka la pyllait paidbah ia ki tiket Lucky Draw jong ka, kiba la pynkhreh ban pynkhalai ha ka Fete kaba la buh ban long ha ka 12 bad 13 tarik Nohprah 2025.

Ha ka jingialang kaba lyngkot, la wan ban long kum u Kongsan da u Bah Nidamon Chulet, uwei na ki nongkhaii ba pawkhmat jong ka jylla, uba la synran da u Bah Roiki Iakai. Ia ka jingialang la pyniaid da u Assistant Waheh Shnong, u Bah Arwotki Sumer, katba u Bah Tista Paswet u la ai ia ki kyntien ai nguh.

U Waheh Shnong Panaliar, u Riquoma Rq. Laloo, u la iathuh lyngkot shaphang ka jingiaid lynti jong ka shnong ban pynmih pisa na ka bynta ki kam pynroi. U la ong ba mynta ka jingthmu ka long beit ban pynbiang ia ka Indoor Sports & Games Complex. U la kdew ruh ba ka jingnoh kylluid mynsiem jong ki khun ka shnong naduh mynshwa ka la pynsuk ban pyndep ia bun ki kam, ryngkat ka jingiarap na ka Sorkar bad ki nongmihkhmat ki Local MDC, Local MLA, MP Rajya Sabha bad u Governor ka jylla.

U Kongsan, Bah Nidamon Chulet, u la iaroh ia ka shnong Panaliar kaba la pyni ia ka jingialehkai bad jingstad ha ki liang bapher bapher. U la ai mynsiem ruh ban trei shitom ban pyndep ia ka Indoor Sports & Games Complex, namar ka jingialehkai ka long kawei na ki bynta kiba kongsan ha ka jingim. U la kyntu ia ki kmie ki kpa ba kin pynshlur ia ki khun ban shim bynta ha ki jingialehkai, namar mynta ka por, ka sports ruh ka dei ka lynti kamai kaba heh, khamtam haba ka Sorkar ruh ka iarap bad pynshlur ia ki nongialehkai. U la kyntu ruh ba ka shnong kan pynneh ia ka jingiatylli, namar ka jingiatylli ka wanrah ia ka jingjop bad jingmyntoi ha baroh ki liang.

Ha ka juh ka sngi, u Marryngkat Syngkon, General Secretary jong ka shnong, u la ai khublei bad pynbna ruh ia ki prize jong ka Lucky Draw kumne:

1st Prize – T.7,00,000/-
2nd Prize – T.3,00,000/-
3rd Prize – Yamaha Scooty lane ka pisa T.1,00,000/-
5 Consolation Prize – kaba mar T.10,000/-

U la pyntip ruh ba ki nongshong shnong lane kino kino kiba kwah ban shim shuwa ia ki tiket ki lah ban phone ha kine ki number: 8974594820 / 8794864344.