Pyllait paidbah u MLA ka Jowai iaka kali kit nongpang ka Khliehtyrshi PHC

Syllad | The Rising MeghalayaSeptember 5, 2020

U Ma Wailadmiki Shylla, MLA jong ka Jowai Constituency ula pyllait paidbah iaka Ambulance jong ka Khliehtyrshi Primary Health Centre haka sngi Saitjain.

Ia kane ka Ambulance la ioh naka Chief Minister Relief Fund (CMRF).

U MLA jong ka Jowai ula ong ba hadien ba ki nongshong shnong ka Khliehrtyshi bad ki shnong ba marjan kiba hap hapoh ka PHC ki shem jingeh ban ioh kali ban kit nongpang ban leit buh sha kiwei ki jaka sumar ula wad kilad ki lynti ban iakren bad u Myntri Rangbah ban pynioh iaka Khliehtyrshi PHC kawei ka kali.

“Haka por ba dang pyrkhing bha iaka lockdown ban iakhun pyrshah iaka khlam COVID-19, nga la sakhi iaka jingshem jingeh ki paidbah ban ioh kali namar bym biang ki kali ki nongpang ha kane ka shnong,” ong u ma Wailadmiki.

Ula ong ruh ba nalor kane ka Ambulance ka PHC shen yn shna iaka surok ban rung sha ka PHC bad kumjuh ki surok shnong ka Khliehrtyrshi.

U Waheh Shnong Khliehtyrshi ma Kitbok Rymbai, ula ong ba kane ka PHC ka peit iaki shnong kiba hap wat haka Amlarem Constituency kiba kynthup iaka Mustem, Iongnoh, Demthring bad ka jingbun briew kala kot da ki phew hajar. “Kane ka PHC kala ai ka jingshakri kaba pura, hynrei ka dkoh namar bym don kali kit nongpang. Ka jingtreishitom u MLA ban pynioh ia kane ka kali kit nongpang kan iarap iaki paidbah kiba wan shim dawai bad ki nongpang ba shitom jur ban kit sha kiwei pat ki jaka sumar,” ong u ma Kitbok.

Kiwei kiwei kiba kren ki kynthup ia u DMHO, West Jaintia Hills District Dr. KC Ajar,u MDC ka thain ma Lakhon Dkhar, u Kitbok Rymbai waheh shnong Khliehtyrshi.

Iaka jingialang la pyniaid da ka MO ka Khliehtyrshi PHC ka Dr Sakahica Dkhar haka jingiadonlang ki Executive Member ka JHADC Saron Paswet, Brightstar Chyrmang, u ma Ailad Bhoi Dy Chairman JHADC, u Octomewot Lamin Nominated MDC bad kiwei kiwei.