Pyllait paidbah u DTO Jowai ïaki sticker taxi kamai ban khanglad ïa kiba kamai beaiñ

Syllad | The Rising MeghalayaMay 21, 2019

JOWAI: Ka West Jaiñtia Hills Taxi Owner & Driver Association (WJHTODA) kala pyllait paidbah ïaki sticker jong ki taxi kamai ha ophis treikam jong u District Transport Officer (DTO), West Jaiñtia Hills District haka sngi ba ar.

Ha kane ka jingpyllait paidbah ïa kine ki sticker la ïadonlang u President WJHTODA Ma H Passah, Secretary WJHTODA Ma Wanroi Jones Nongbri bad kiwei kiwei ki dkhot ka WJHTODA. Ïa kine ki sticker lah ban ïoh na u secretary ka WJHTODA naduh ka 22tarik Jymmang 13 tarik Jylliew.

Shuwa ban pyllait paidbah ïa kitei sticker u DTO Ma Ricky Tariang ula kyntu ïaki nongniah bad trai  taxi ba kin long ki nuksa ïa kiwei kiwei ki nongniah kali kamai ban pynbiang ïaki kot ki sla kali bad ban bud ryntih ïaka aiñ niah kali.

Ka WJHTODA manla u snem ka pyllait ïa kine ki sticker sha ki nongniah taxi kamai kiba biang ki kot ki sla bad kamai ha sor Jowai khnang ban khanglad ïa ki briew kiba shim kabu ban kamai khlem kot khlem sla. Ïa kine ki sticker la tah haka ïit ba hakhmat ki taxi kiba don bad ki number ban pynsuk ïaki nongshong kali bad ki paidbah ban kynmaw lada don mano mano ki nongniah kali kiba iaid lait iaki aiñ niah kali.