Pyllait paidbah u CM iaka projek ban ialeh pyrshah iaka jingkylla ka suinbneng ba kynjoh T.500 klur  

Syllad | The Rising MeghalayaMay 27, 2025

U Myntri Rangbah ka Jylla u Conrad K Sangma haka sngi Nyngkong u la pyllait paidbah ia ki katto katne ki sienjam kiba kongsan kiba iadei bad ka Climate Action bad Climate Adaptation ha ka jingialang kaba la long ha Mendipathar, North Garo Hills.

U CM u la buh ruh ia ki mawnongrim na ka bynta ki sienjam bapher bapher ha ka jingiadon lang u Myntri ka tnad PHE u Marcuise Marak, u Myntri ka tnad Social Welfare u Bah Paul Lyngdoh bad ki MLA kiba kynthup ia u Marthon Sangma bad u Rupert Momin, bad u la plie ruh ia ki artylli ka hostel thymmai jong ki kynthei ha Mendipathar bad ka Tribal hostel ha Resubelpara.

U la pyntip ba ka Climate Adaptive Community-Based Water Harvesting Project –ba la kyrshan da ka ADB ka dei ka project kaba palat T.500 klur ia kaba yn pyntreikam ha baroh ki District ka jylla Meghalaya ban khmih halor ka jingpynneh ia ka jingdon jong ki um ki wah.

Nalor kata u la plie ruh ia ka “Megh Adapt Pay”, ka project kaba T.47.19 klur kaba dei shibynta jong ka Climate Adaptive Community Based Water Harvesting Project ban thung dieng, ban pynneh pynsah ia ki khlaw bad ki jaka rep kiba la don lypa ia kiba la pyntreikam da ka tnad Soil & Water Conservation.

U Conrad u pyntip ba lyngba kine ki projek, na ka liang ki shnong ki thaw bad ka sorkar kin iatreilang ban iarap na ka bynta ban iada ia ki khlaw ki btap, ban pynkhie im biang ia ki jaka kiba la sniew, ban kyntiew ia ka koit ka khiah ha sawdong sawkun, ban pynneh ia ki jaka ba don ki tyllong um bad ban pyniar ia ka jingpynjyrngam ha kylleng ka jylla.

Ia ka Girls’ Hostel ha Mendipathar College la tei ha ka jinglut kaba kot T.3 klur bad ia kaba yn pyniaid da ka kynhun Awe Self-Help Group (SHG). Katba ia ka Tribal Girls’ Hostel ha Resubelpara la tei ha ka jinglut kaba kot T.2.5 klur ia kaba yn pyniaid da ka Ramke Memorial School.

“Kine ki hostel kin ai ia ka jingshngain, jingiadei bad kyrshan ia ka rukom im jong ki kynthei khamtam kito kiba dei na ki thain nongkyndong kiba pajih bad ban iarap ruh ia ki ba kin bteng ia ki jingpule khlem kino kino ki jingeh,” bynrap u CM.

Ha kajuh ka por u la pynpaw ruh ka jngkmen halor ka jingkiew ha ka percentage jong ki khynnah kiba pass ha ka eksamin SSLC bad pyntip ba ka result ka jong ka Supplementary eksam ruh ka la nangkiew ha ka percentage sha ka 96 percent kaba dei kaba heh tam ha ka thain shatei lammihngi bad lehse kaba bha tam hapoh ka ri.

U la bynrap ruh ba kiba bun ki la kynthoh bakla halor ka ‘CM Impact’ guidebook, hynrei kylli ia ki khynnah bad na ki kmie ki kpa. U la ong ba ha ki por kiba la leit noh ruh kiba bun ki la pyndonkam ia ki guidebook ha ka SSLC bad ha kiwei pat ki eksam, bad ka CM Impact ka dei ka jingtuklar ban kyrshan ia ki khynnah pule ki bym don ia ka lad ban ioh ia kitei ki Guidebook.

Ha kane kajuh ka sngi u CM u la plie ruh ia ka building kaba thymmai jong ka Bajengdoba Block Development Office ha ka jingiadon lang u Myntri ka tnad C&RD u AT Mondal, u Myntri ka tnad Soil & Water Conservation u Marcuise Marak, ki MLA kiba kynthup ia u Marthon Sangma, Pongseng Marak bad u Rupert Momin.

Haba plie ia u maw kyrteng ban plie ia ka ophis bathymmai jong ka block ha Bajengdora, North Garo Hills, u la ong ba ka sorkar ka la pyrshang katba lah ban shna ia ki jingtrei ba kongsan ha ki thain nongkyndong jong ka jylla.

U CM u la pynpaw ba 70 na ka 100 ki kam jong ka sorkar kiba trei napoh napoh ka shong ha ki block office, bad u la ong ba ki block office ki long ba donkam ban pyntrei kam ha ki thain nongkyndong ia ki kam ba bha jong ka sorkar. U la pyntip ruh ba ka sorkar ka la mang haduh 120 klur ban kyntiew ne pynbha ia ki block ophis ha kylleng ka jylla.

Nalor kata u la pyntip ba ka sorkar ka la rai ban thaw ym duna ia ka 10 tylli ki C&RD block thymmai ki dang iaid shaphrang hapoh ka jingbishar bniah ka sorkar.