Pyllait ka Sorkar T.20 klur sha ka JHADC, yn pynbeit iaka jingtreikam ki 3 ADCs: Conrad

Syllad | The Rising MeghalayaMay 22, 2025

U Myntri Rangbah ka jylla Meghalaya, u Conrad K Sangma ha ka sngi Balang u la ong ba ka sorkar jylla ka dang trei ban wanrah iaka rukom treikam kaba skhem ban shngain ka pla tyngka jong ki lai tylli ki Autonomous District Council (ADC) ha ka jylla.

“Ngi dang don ha ka jingpynkhreh (planning stage) kumta ngan kiar na kaba ai jingtip bniah mynta hi”, la ong u Sangma ha ki nongthoh khubor hadien ka jingialang bad MDC ka liang synshar jong ka JHADC haka jingialam u CEM Thombor Shiwat ha Orchid Inn, Thadlaskein.

U la ong ba ka iarong pisa jong ka JHADC kala long hiran bha hadien ka jingkhang tih dewiong, kaba la wanrah ia ka jingeh ban siew tulop ba sah jong ki nongtrei.

“Hynrei ngi la poi mynta sha ka bynta kaba ngi hap ban pynbeit iaka rukom treikam, hynrei ka jingktah haka liang ka pisa pilain ka dang don ha JHADC bad kiwei ki district councl, ka KHADC bad GHADC,” la bynrap u CM.

U Sangma u la pynbna ruh ba ka Sorkar Jylla kala pyllait sa T.20 klur na ka bhah ba ka konsil.

“Sa ka T.19 klur ka dang sah bad ngin pyrshang ban pyllait ha kine ki ar ne lai taiew ban wan,” da kaba pynpaw ryngkat bad kane ka pisa kan pynjem iaka jingeh jong ka konsil.

Shuh shuh u Myntri Rangbah u la ong ba ha kane ka jingialang la iakren ruh halor ka jingdonkam ban wad ia ki lad ki lynti ban kyrshan shuh shuh ia ka JHADC bad ia kiwei pat ki artylli ki ADC. Katkum ka jingong jong u, ka sorkar ka kwah ban pynkylla thymmai ia ki ADC ha ka liang ka synshar khadar bad ha ka liang ka pisa tyngka ban pynbha ia ka jingtreikam jong ki.

“Ngin sa buddien ia kane da kaba shong jingialang biang ha kine ki ar ne lai sngi ban wan. U Symbud Myntri Rangbah ka jylla u Sniawbhalang Dhar un shong jingialang bad ki nangta haka finance level bad kiwei kiwei ban iakren sani bha halor kane ka kam”, u la ong.