Pyllait ka Sorkar Jylla ia ka 1st Installment ka Post Matric Scholarship sha ki samla pule

Syllad | The Rising MeghalayaJune 23, 2025

Ka Sorkar Jylla lyngba ka Tnad pule puthi ka la pynbna ba la pyllait ia ka 1st installment (20%) jong ka Post-Matric Scholarship sha ki samla pule Scheduled Tribe (ST) na ka bynta ka snem pule 2024-25, ka ban ai jingmyntoi ia ki 66,000 ngut ki samla pule kiba la dep pyniasoh ia ki account jong ki bad u Aadhaar.

Ia ka pisa kaba sah yn pyllait ha ki 2-3 installment da kaba pynshong nongrim katkum ka por ba la buh ban pyllait ia ka pisa na ka Sorkar India.

“Ha ki snem kiba la dep, ka Sorkar India ka ju pyllait ia ka Post Matric Scholarship ha ki 3–4 instalment, ha kaba kawei kawei ka instalment ka bynta ka kynthup tang ia shibynta jong ki samla pule. Kumta bun ki samla pule ki la hap ban ap khmih lynti ia ka bhah ka jong ki. Hynrei, naduh mynta u snem ka Tnad pule puthi ka la pyntreikam ia ka sienjam kaba thymmai ban pynthikna ba man la ki samla pule kiba dei ban ioh kin ioh ia kane ka scholarship ha man la ki instalment,” ong u Commissioner & Secretary ka Tnad pule puthi u Vijay Kumar Mantri lyngba u kyrwoh hynne ka sngi U Blei.

U la pynshai ruh ba kane ka scholarship ym dei ban sngewthuh bakla bad ka Chief Minister’s Scholarship Scheme ia kaba la pynbna ha ka Dorbar Mangtyngka kaba la long ha u bnai Lber ba la dep. Ka jingpynrung kyrteng na ka bynta ka CM’s Scholarship Scheme kan sdang hadien ba la pynmih ia ka jingpynbna paidbah ia ka skhim bad ki jingbthah ba bniah jong ka.

U la bynrap ruh ba na ka bynta ki 7,902 ngut ki nongioh jingmyntoi ki bym pat shym la ioh pdiang ia ki scholarship jong ki, ia ki jingpyntip lyngba ki SMS la phah ha ka 20 tarik Jylliew 2025 lyngba ka National Scholarship Portal (NSP) sha ki mobile nombor jong kito ki samla kiba la register da kaba aijingmut ia ki ba kin pynshisha bad pynthymmai ia ka jingpyniasoh ia u Aadhaar bad ki bank account jong ki.

Hadien ba la ioh ia ki SMS, ki nongioh jingmyntoi ki la ioh por 15 sngi ban pyndep ia ka jingpyniasoh Aadhaar. Hadien kane ka 15 sngi, ia ki jingsiew na ka bynta kito kiba la dep pynthymmai ia ka jingpyniasoh Aadhaar yn pyntreikam ia ka jingsiew lyngba ka NSP system, u Commissioner da kaba bynrap ba ka NSP system kam shah ban pyllait ia ka pisa shwa ban kut ka por 15 sngi hadien ka jingphah ia ki SMS.

Na ka bynta kino kino ki jingkylli ne ki jingtip ba kham bniah, ki samla pule ki lah ban thoh sha ka [email protected]. lane phone sha kine ki nombor: 7005037347/ 9077574956.