Pyllait ka NEC ia ka song pisa ba palat T.9 klur ban pyntrei ia ki 7 tylli ki project kam pynroi

Syllad | The Rising MeghalayaJuly 5, 2025

Ka North Eastern Council (NEC) ka la pyllait ia ka song pisa kaba kot palat T.9,14,55,500 klur ha u bnai Jylliew ba la dep ban pyntreikam ia ki hynniew tylli ki project kam pynroi ha Meghalaya.

Na kane ka song pisa T.3,21,18,750 klur la pyllait na ka bynta ban tei ia ka RCC G+4 Commercial Building jong ka Iewdakm Laban Municipal Market, Shillong na ka bynta ban jied ia ki jhur ki jhep, ki soh ki pai, ki tiar shna bad thain kti, doh sniang bad kiwei kiwei.

Kumjuh la mang T. 1,02,89,000 klur na ka bynta ki jingtei ba iadei bad ki kam jngohkai ha Laitlyngkot (Lamlyer) ha East Khasi Hills District, T.1,24,52,000 klur na ka bynta ki kam pynroi ha ki jaka ba la shu iehnoh, ki bynta jong ki shnong kiba shah iehnoh da kaba kyntiew ia ka pule dangle lyngba ka jingkyntiew kyrdan ia ki katto katne ki skul Mission (RKM School, Umploh & Mawkynrew).

T.1,47,37,000 klur -RKM School, Jalapet & Laityngkot, T.1,07,64,000 klur- RKM School, Laitlyndop bad Mylliem, T.73,04,000 – RKM School Mawsmai bad T.37,90,750 klur na ka bynta ka jingtei ia ka Cultural Hall jong ki hynriew tylli ki Sein Raij ha East bad West Jaintia Hills District.

Nalor kine, ka NEC ka la pyllait ruh ia ka song pisa kaba T.8,88,00,000 klur hapoh ka NESIDS (Roads) na ka bynta ka jingshna ia ka surok Pynursla -Latangriwan -Mawlynnong.

“Ia kine ki song pisa la pyllait ban kyrshan halor ki kam bapher bapher bapher, kaba kynthup halor ki jingpyniasoh da ki surok, ki jingtei kam jngohkai, ki jingtei ba iadei bad ka kolshor bad ka jingpynpoi ia ki kam pynroi sha kito ki jaka ba la shu iehnoh,” ong ka NEC lyngba u kyrwoh.

“Ka NEC ka dang bteng ia ka jingkut jingmut kaba skhem halor ki kam bei tyngka ha ka por kaba biang ban pynthikna ia ka jingpyntrei bad pyndep ia ki kam pynroi bapher bapher hapoh ka jylla Meghalaya,” ka la bynrap.