Pyllait u CM ia u synsar ba 1700 MT na Ri Bhoi ban shalan shabar ka Meghalaya

Syllad | The Rising MeghalayaMay 10, 2025

U Myntri Rangbah ka Jylla Meghalaya u Conrad K Sangma haka 9 tarik Jymmang ula pyllait ia u synsar ba 1700 metric ton ban shalan shabar ka jylla Meghalaya na Khlieh Umsten ha Ribhoi district.

Ïa kane ka mar yn phah sha Central Warehousing Corporation ha Guwahati ba kan lilam sha ki nongthied kiba lah ban khlieh dor.

Ia kane ka sienjam la leh hapoh ka CM-ASSURE, ka prokram ba kongsan jong ka sorkar kaba thmu ban kyrshan ia ki nongrep na ka jinghiar dor u synar ha ha iew. Ka CM-ASSURE ka pynleit jingmut ha ki mar ki mata ki bym pyut bad kiba kham neh slem.

Ha kane ka prokram, u myntri rangbah ka jylla u la aiti ruh ia ki kali pick-up sha ki nongioh jingmyntoi na ka CM-Elevate.

Haba kren ha kane ka sngi, u la pyntip halor ka jingtreikam jong ka sorkar ban kyntiew ia ka rep ka riang bad ka bha ka miat jong ki nongrep.

U la pyntip ba ka Sorkar kala shim ia ki sienjam ban wanrah ia ka jinglong jingman ban pynkiew iaka rep ka riang bad ka jingpynmih ia kiwei pat ki mar na ki marrep.

U la kdew ba kawei na ki jingtynjuh ba ka Jylla ka iakynduh ka dei ka jingpynkiew ia ka jingpynmih ia ki marrep, kaba long kongsan bha naka bynta ban myntoi ki nongrep bad ka kam rep hapoh ka Jylla. Hynrei u la pynthikna ba ki kynhun bapher bapher kila ai iaka ïatreilang ban weng ïa kane ka jingeh.

“Ka sorkar kan ïatreilang bad ki paidbah bad ki nongseng kam seng jam ban wanrah ïa ka jingkylla ha ka ïoh ka kot ha nongkyndong lyngba ki rukom rep kiba bha tam”, u la ong.

Ki jingsdang jong ka Meghalaya ha ka liang ka rep ka riang, kum ka CM-ASSURE bad ka CM-Elevate, ki pyni ia ka jingshimkhia jong ka sorkar ban kyrshan ia ki nongrep bad ban kyntiew ia ka roi ka par. Kine ki jingthmu ki thmu ban kyntiew ia ka ioh ka kot jong ki nongrep, ban kyntiew ia ka jingim, bad ban noh synniang sha ka roi ka par jong ka jylla.