Pulom ka skim JJM ha Saphai

Syllad | The Rising MeghalayaJanuary 17, 2025

Ka skim umbam umdih kaba dei ban pynioh umbam umdih iaka shnong Saphai kala pulom wat hadien ba ka por kaba la buh kala kut, kata ha u snem 2023.

Kane skim umbam umdih ka hap hapoh ka skim Jal Jeevan Mission (JJM), kaba ka jingthmu ka skim ka long ban pynpoi um ha man la ki thliew iing, pynban ka Khasi Students Union Kupli Area circle kala kynnoh ba kane ka skim kala phiel bad la trei torti kynthup haka shnong Saphai bad ka Umsalait.

Ka KSU kala pynkynmaw ba kila wna ban iakynduh iaka EE jong ka PHE Rural Division, West Jaintia Hills District, kong R. Kynjing haka 18 Nailur 2024/24 ban kyntu ban pynpoi um ha man la ki thliew iing, pynban haduh mynta kine ki shnong kim ioh um satia.

U Balawantei Suchiang president KSU Kupli Area Circle, Leikirichard Tyngkan General Secretary KSU Kupli Area Circle bad ki nongshong shnong kila kyntu iaka tnad PHE ban shimkhia ia kane ka mat bad ban wan jurip dalade ia kane ka projek tan um bad ban pyndep khnang ban myntoi ki nongshong shnong.