Puk mih kynsan ki paidbah hadien ba pynbna khangdam u Conrad ha East Khasi Hills

Syllad | The Rising MeghalayaMay 5, 2021

U paidbah nongshnong jong ka nongbah Shillong shu san kynsan puk u la mih na la iing la sem ban kieng artad ia la ka pla ban khohreh ha kaban leit ban siew ban tda ia ki marbam mardih, tang hapdeng khyndiat kynta, ba u Myntri Rangbah ka jylla u Conrad K Sangma u la  shim ia ka sien jam ban hap ban pynbna, ba ka nongbah Shillong kan leit noh sha ka jingkhangdam ha kine ki san sngi ki ban wan.

Na ka jingiaid lynti jong u Syllad, la shem bad iohi ba u paidbah namar kane ka jingpynbna ba shu san kynsan, u paidbah u khlem don shuh kano kano ka jingtieng jingsmiej, hynrei ba kin ia lum paidbah beit ha man la ki dukan  kiba don bad ba la plie ha man la ki dong ki kyntoit jong ka nongbah Shillong.

Kane ka la pynlong ia ki bor pulit na ki thanat kiba don ha ki jaka ki jong ki ban phah peitngor mardor ia la ki langrut khnang ban teh lakam ia ka jingmih syndet jong ki paidbah sha ki iew, ki dukan bad ba kin ialeh ban hukum ia ki paidbah ba kin ieng da uline uba pyniajngai iwei na iwei pat.

Toi wat la ki pulit ki pyrshang ban wanrah ia ka jingjai jai, hynrei u paidbah namar ka jingkyndit ban ioh sngew ia kane ka rai, um shim la treh ba un kohnguh hynrei ban sdang wat sa ban shu ialeh katba lah ban ioh kham kloi ia ki marbam kiba u thmu ba un thied.

Haba iakren bad u nongthoh khubor, ki paidbah ba bun balang ki sngew ban pynpaw ba kane ka rai toi wat kan ktah bha ia u duk u suk, hynrei ki la  ong  pat ba ha ka jingshisha ka sorkar ka la dei ba kan shim ia ka rai khangdam kham haduh mynshwa.

“Ngi tip bad iohi man la ka sngi ia ka jingsdang ban pur sted bha jong u khniang jingpang Coronavirus, kaba pyntieng bha ia ngi, hynrei shu hak dak ban shim ia kane ka sien jam ban pynbna ia ka jingkhangdam, ka long kaei kaei  ka bym lah ban long”, ong ki paidbah nongthied nongpet.

Katba ki ba shu im da ka bylla kiba kamai mynsngi bad bam da miet, ki pynpaw ba kane ka jingrai syndet ka pynshai-iong hi ngain ia ki, namar ba dei artad ba dang dei tang hapdeng taiew, ha kaba ka bylla sngi dang ioh ban kamai tang ar ne lai sngi, da kumta ban shu hak dak ban shim ia ka rai ban khangdam, ka jingeh ka la ap mynta ha iing ba naei yn pyndap ia ka jingdonkam ha la iing ha kine ki san sngi kiban wan, bad kaba kham pyndiaw mynsiem ia ki ka long ba kim tip sa kaei kaban jia hadien jong kine ki san sngi kiban wan.