Pruid lynti u CM Conrad ban pynkhlain haka Koit ka Khiah, Sports bad ka Um haka jingbishar kam ha Tura

Syllad | The Rising MeghalayaAugust 29, 2025

U Myntri Rangbah ka jylla u Conrad K Sangma ha ka 28 tarik Nailar u la lum ia ka jingialang bad ki heh ophisar hapoh Circuit House ha Tura, West Garo Hills ban iakren halor ki bynta kiba kongsan jong ki kam pynroi ha Meghalaya, kata ka koit ka khiah, kam sports bad ka kam sam um.

Ha kane ka jingialang la iatai sani bha ha kaba iadei bad ki sienjam ban pyniaid shakhmat ia ki project kam pynroi, ban pynbeit ia ki jingeh kiba iakynduh na ka bynta ka jingbit jingbiang jong ki nongshong shnong ka jylla.

U Myntri Rangbah u la ong ba kane ka jingialang ka dei kaba la thaw ha ka rukom ha kaba ki ophisar ki lah ban pynpaw da ka jinglaitluid halor ki jingeh bad ban tyrwa ia ki lad ban pynbeit bad weng ia ki jingeh. U la ban jur ba kum kine ki jingbishar bniah ki dei ban iaid shabar jong ki kaiphod jong ka jinglong jingman bad ban shakri kum ki lad ban pynbeit ia ki jingeh na ka bynta ki jingmih kiba ktah bad seisoh.

Ha ka jingialang la iakren halor ka Tura Medical College kaba mynta ka jingpyndep ia ki jingtei ka la kynjoh sha ka 80 percent bad kaba la pynkhreh ban pyndep ha u Nailur 2026, ia kaba la tei ha ka jaka kaba ka jingheh ka long haduh 84 akar ha kaba ka college bad ki jaka treikam kan kynthup ha ka jingheh kaba 47,000 sq.meter bad 14,096 square meter na ka bynta ka Hospital aijinghikai ka ban don haduh 735 tylli ki jingthiah. Watla katta la pynpaw ka jingsngewkhia ha kaba iadei bad ka jinglong jingman jong ka surok bad halor ka jingdonkam ia ki nonghikai.

Ha kaba iadei bad ka Shillong Medical College u Myntri Rangbah u la ong ba ka jingshim klas kan sdang naduh u bnai Nailur 2025. U la ong ruh ba hapdeng ki snem 2030, lyngba ka Shillong, Tura bad ka USTM Medical College ka Meghalaya kan pynmih palat 550 ngut ki doktor man la u snem bad ka ban pynduna ia ka jingshaniah tylli jong ka jylla ha ka Central Pool Seat bad ka ban kyntiew ha ka liang ki lad jingsumar.

Ha kane ka jingialang la iakren ruh halor ka jingdonkam ban tei ia ki jaka ialehkai ban kyntiew ia ka sports ha ka jylla, ha kaba na ka liang u Conrad Sangma u la pynpaw ia ka jingdonkam ban saindur naduh ki shnong ki thaw bad ki block, ka jingpynkhlain ia ki club shnong bad ka jingpynlong ia ki lympung ialehkai ha ki kyrdan district bad ka jylla khnang ban khring ia kiba bun ki nongwan iashimbynta.

Ban weng ia ka jingduna jong ki coach bad ki referee kiba tbit, u Myntri Rangbah u la tyrwa ia ki prokram ban aijinghikai ia ki ophisar sorkar na ka thain bad ban pynrung ia ki nongialehkai kiba la shongthait kum ki nonghikai. U la bthah ruh ia ki bor pyniaid district ban shimkhia halor ki sienjam ban kyntiew ia ka sport da kaba pynpaw ia ka jingdonkam ban pynroi ia ki sap ki phong bad ban pynthikna halor ki jingthmu kiba iadei bad ki jingtei ia ki jaka ialehkai.

Kumjuh la iatai sani ha kaba iadei bad ka jingpyntrei ia ka skhim Jal Jeevan Mission ha kaba la pynpaw ba haduh 90 la lah ban pyndep ia ka kam. Watla katta la kubur ba jan haduh kumba 20 percent jong ki longiing ki dang iai bteng ban mad ia ka jingkyrduh um.

U Myntri Rangbah ula banjur halor ka jingdonkam ban leh ia ka Audit ha ka jylla baroh kawei ban lap kiei ki jait skhim kiba treikam bha bad ia kiba pulom khnang ba yn lah ban shim ia ki lad ban pynbeit ia kine ki jingeh. Ula pynpaw ruh ba ha ki jaka lum, ka jingduna ka bording kala ktah bha iaka jingpynbiang ia ka umbam umdih, katba ha ki jaka madan ka jingpyndonkam ia ki projek Solar ka dang duna bha.

Nalor kata la pynpaw ruh ba ka jingbym biang ha ka liang ka jingbei tyngka ruh ka dei kawei na ki jingeh, ha kaba haduh jan T.2,000 klur la pynsahteng ban siew sha ki kontraktor namar ka jingpynslem jong ka sorkar India ban pyllait ia ka pisa.

U Sangma u la ong ruh ban peit bad pyniaid iaki VWSC ka donkam T.500 klur shisnem ka long kaba ym lah ban long, bad ai jingmut ban wad iaki rukom treikam ka ban iatreilang ki kynhun SHG, NGO bad ki seng samla ban maramot bad u kontraktor u dei ban kitkhlieh ia ki skhim na ka bynta 2–3 snem hadien ba la dep.