Ka Jingkyrpad ki Private & Contract Nurses Meghalaya

Syllad | The Rising MeghalayaJune 3, 2021

Kum ki Nurse jong ka jylla Meghalaya
Ki ba trei private bad contractual mynta
Ngi kwah lang ban pynsngew sha phi ka sorkar
Ia ki jingjynjar ba ngi mad salonsar

Sorkar ngi kyrpad ia ngi ruh to pyrkhat
Kat dang sah ka mynsiem ia ngi to ai lad
Kumba phi ong ngi dei ki ba ha khmat tam
Ban ia khun ia ka khlam ban pynduh pyndam

Kumta ngi wan hakhmat ka burom jongphi
Ban pynshai jingdonkam lyngba ka poetry
Ban pynpaw ruh jingeh jingjynjar jong ngi
Ba phin sngap bad phin pdiang pyntrei kam ruh hi.

Ha ka por leit pule pynlut da ki lak
Ynda ladep nangta sa wan trei contract
Ha I jingsiew barit ka kam ka baeh
Tang shukut ka jingsoi nangta la shah beh

Haba ngi ia nujor bad ki regular
Baroh ki kam kijuh ngi trei salonsar
Pynban balei ia ngi jingsiew bymthikna
Shuti ruh ym judon ka kam ka dawa.

Myntoi aiu phin pyrkhat ynda ngi iap
Ban ai 50 lak mynsiem kam wan phai pat
Pyrkhat lem ia ngi katba dang ring mynsiem
Ban biang ka jingsiew bad kiwei pynsyriem.

La jingim ngin ai ban pynim ia kiwei
Ngin trei khlem tyngkai kat dang ai bor U Blei
Ia ngi ruh pyrkhat Kat dang im ha pyrthei
Namar ngi donkam kumba don kam kiwei

Ki juh ki uniform ngi phong ha duty
Ngim ju ioh allowance na bynta jong ki
Ngi sah wai ka ing bad baiwai ngi hap siew
Watla katta jingsiew jong ngi phim pynkiew

Ki ong ban bam bha shwa ban wan leh duty
Daei kein ngin bam Pisa tang shi dam li
Tang thied jingsiew shisien shibnai ruh kam dap
Katno jingsngew kordit bad jing sngew sangpap

Ngi sngew ka sorkar ka la pynbna mynshwa
“Equal work equal pay” kam trei kam shisha
Balei ia ngi ki Nurse la shah khein poh
Jingioh ka bymdap tang shibnai I ja kpoh

Haba ia nujor bad ki wei ki jait kam
Kiba deal ha ki machine bad ki riat ki ram
Ia ki la ju ai da ka jingsiew ba kor
Ia ngi pat la siew da jingsiew ba poh dor

Ia ngi ki ong ngi dei angel jong U Blei
Bala phah bujli ban pynim ka pyrthei
Hynrei ia kita ki angel phi khein poh
Ki jingsiew phi ai bym dap tang ka ja kpoh

Ngi kyrpad ia ki sengbhalang ki ba pher
Lada phi sngew synei iala kti to kner
Ban ia kren ia kane na bynta jong ngi
Ki shipai ba ha khmat jong kane ka Ri.

To sngap seh ko sorkar pynbiang jingduna
Ba ki Nurse ki mad ha kylleng ka jylla
Ngi kyrpad ba phin thung regular ia ngi
Ba ngin shakri khambha kat dang mih ki sngi.

Khublei shibun.