Pra phom ka kynroh ïing lait thaw ki briew ba tynrah ka trok hapoh dong ha Ladthadlaboh

Syllad | The Rising MeghalayaApril 13, 2022

Ki nongshong shnong jong kyntoit Riatmoolain hapoh Ladthadlaboh, Jowai ki la her syrngiew mynta ka janmiet haba kawei ka trok kaba don ia u nombar plate ML04 C 6788 ka la leit tynrah ia kynroh bad ka gate jong kawei iing harud surok ha ka por ba ka phai sha dien.

Katei ka trok ka dang wanrah bam jong ka skim ICDS. Kane ka trok ka dei kaba wan buh bam ha godown hapoh jong ka ophis CDPO Thadlaskein na ka bynta ban sam sha ki Anganwadi bad kiwei kiwei ki jaka ai jingbam khynnah.

Katei ka trok ka la pynpra phom ia ka kynroh bad ka gate.

Ha kane ka jingjia ym don satia kano kano ka jingmynsaw mynsnam ia ki briew namar ba haka por ba jia kane ka jingjia ym shym la don briew kiba mih surok ne mih ha phyllaw iing jong katei ka iing.

Ki nongshong shnong ki la buh dak jingkylli balei ba shah ban rung katei ka trok 18 tyres hapoh dong bad kaba ieng harud surok da ki bun ki kynta na bynta ban pynhap bam ne kit bam. Ia katei ka trok la wan shimti da ki pulit ka tnat Traffic Jowai.