Poi ka samla Rifiness Warjri sha kliar u lum Mount Everest; kynjoh lai ngut ki kynthei Khasi

Syllad | The Rising MeghalayaMay 20, 2025

Ka samla Rifiness Warjri 20 snem rta na St Anthony’s College bad kaba dei ka Cadet jong ka 61 Meghalaya Girls Battalion NCC, kaba la ioh ban mihkhmat tang marwei na kane ka thain Shatei Lammihngi ha ka NCC Mount Everest Expedition, 2025, ka dei kawei na ki 38 ngut ki dkhot NCC kiba la pyndep ban kiew ia u lum Mount Everest ha ka kynjang kaba 8849 mitar ha ka 18 tarik Jymmang.

Kane ka jingjop jong kane ka samla na ka Jylla ka pyni ia ka jingminot bad ka jingtrei shitom, ka jingiai shah bad ka jingtbit jong ki samla na kane ka thain Shatei Lammihngi. Katei ka kynhun ka la pyndep ban kiew ia u lum Everest ha ka por 04:45 baje mynstep.

Ki arngut kiwei pat ki thei kiew lum na kane ka jylla Meghalaya kiba la ioh kham hashwa ia kaba kum kane ka jingjop ki kynthup ia ka Kong Wansuk Myrthong, ka pulit constable kaba kiew ia une u lum ha u snem 2013 bad ka Senior GCI Dolyne Kharbhih na ka 61 Meghalaya Girls NCC Battalion kaba dei ruh ka NCC Cadet barim na Ri Bhoi kaba la ioh ia ka jingjop ha kaba kiew ia une u lum ha u snem 2016.

Nalor katei ka jingjop ia u Everest, ka Rifiness ka la pyndep ruh ha kaba kiew ia u lum Mount Abi Gamin ha ka kynjang kaba 7,355-mitar ha Uttarakhand ha u bnai Nailar jong u snem ba la dep.

Ka samla Rifiness ka la pynlut ia ka por jinglong khynnah jong ka ha Jylli Shop hashwa ba kan kynriah noh sha Kynton-u-Mon, Laitkor. Ka dei ka khun kaba lai napdeng ki san ngut shipara. Ka Rifiness ka la ai burom ia ki kmie ki kpa, kata u Bah Shlurbor Kharmyndai bad ka Kong Diamondsea Warjri kum ki nongkyrshan ba hakhmat eh ha baroh kane ka jingiaid lynti ka jong ka.

Na ka bynta ki nongshong shnong ka thain Shatei Lammihngi, kane ka jingjop jong ka samla Rifiness ka la long kham palat ban ia ka jingjop shimet jong ka, bad ka la long ruh kum ka jingkyrmen na ka bynta kiwei pat.

Ka jingsngewtynnad ka jong ka ia ka kam kiew lum ka la sdang naduh ba ka la don bynta bad ka NCC ha ka por ba ka dang leit skul ha Auxilium Convent Shillong. Dei lyngba ka NCC ba ka la sdang ban sngewtynnad ha ki kam sport bad iashim bynta ha ki prokram bapher bapher jong ka NCC.

Nalor ka jingangnud ha ka kam kiewlum, ka Rifiness ka dei ruh kaba tbit ha ka jingialehkai Wushu martial artist bad Kickboxing ha kaba ka la ju mihkhmat ruh ia ka jylla ha ki jingiakop bapher bapher.

Kine ki jingiashim bynta ki jong ka ki la iarap ban tei ia ka met ka phad bad ia ka bor pyrkhat pyrdain jong ka bad kaba lam ruh sha ka jingjop ban kiew ia u lum uba jrong tam ha ka pyrthei u Mount Everest.