Plie u Myntri Rangbah ia ka CM Connect Centre ha WGH; Rai ban buh ha baroh 56 tylli ki block ha ka Jylla

Syllad | The Rising MeghalayaAugust 31, 2025

U Myntri Rangbah ka jylla u Conrad K Sangma ha ka 30 tarik Nailar u la plie paidbah ia ka CM Connect Centre ha PA Sangma Stadium Tura, West Garo Hills, da kaba pynbna ruh ia ka rai ban thaw ia kine ki Centre ha baroh ki 56 tylli ki block ha ka jylla.

U la ong ba kane ka Centre kan long ka rynsan ka ban iarap ia ki nongshong shnong ba ki lah ban phone beit beit ha u nombor 1971-CM Connect ban pynpaw ia ki jingeh, ki jingai jingmut na ka bynta ban lah ban lah ban pynbeit mardor.

Haba aijingkren ha ka jingialang, u Myntri Rangbah u la ong ba ka CM Connect kam dei tang ka prokram, kam dei tang u phone nombor ne tang ka ophis, hynrei ka dei ka jingmut bad ka jingthmu ba kongsan jong ka sorkar. U la batai ruh ba ia kane ka sienjam la tei halor ka nongrim ba u Myntri Rangbah ka jylla bad ka sorkar ki dei ban iai don ia ka jingiadei kaba jan bad ki paidbah.

“Lada u khlieh jong ka sorkar um lah ban pyniasoh bad sngewthuh ia ki jingeh jong ki paidbah, ka wanrah ka jingeh ha ki lad jingiakren. Ia kaba kum kane ka jingeh lah ban khanglad ia ngi ban pynbeit ia ki mat kiba donkam shisha ia ki nongshong shnong jong ngi bad ka lah ban wanrah ia ka rukom synshar kaba khlem pynpaw ia ki jingdonkam jong ki,” u la ong.

U la batai ruh kumno ka CM Connect kan treikam lyngba ki laitylli ki lad ba kongsan, kata ki jingpynbna lyngba ki kor teknoloji ka ban ailad ia ki nongshong shnong ban pynpaw ia ki jingeh bad ban wad jingtip lyngba da kaba shu phone ha u helpline nombor 1971 khlem da donkam jingsiew, lyngba ki WhatsApp services, chatbots bad ka website jong ka CM Connect. Ia kine ki jingeh yn buh jingthoh, yn buddien bad phah sha ki tnad ba dei peit ban pynbeit ha ka por kaba biang.

Kaba ar ka jingiakren ba beit beit bad ki nongshong shnong kan dang bteng ban long u mawjam ba kongsan jong kane ka jingthmu, ha kaba u Myntri Rangbah ka jylla un ioh ban iakren markhmat bad ki paidbah ban sngap ia ki jingeh jong ki.

“Ka CM Connect kam dei shaphang ki jingkren, hynrei ka dei shaphang ka jingsngap. Ngi lah ban pyrkhat ba ngi leh ia kaba dei eh, hynrei lymda ngi iohsngew hi na ki paidbah ngim lah ban tip ia ki jingshisha,” u la kynthoh.

Kaba lai yn buh ia ki CM Connect Centre ha baroh ki 56 tylli ki block jong ka jylla, katba ki ophis kiba don ha ka kyrdan block kin treikam ha ka rukom kaba kham rit, ki jaka treikam jong ki district kin buh ia ki jaka kiba la pynbiang pura ia ki nongtrei ban iarap ia ki nongshong shnong. Katba nangiaid ki sngi kine ki centre kin sa nangkiew ban aijingshakri kum ka jingai ia ki syrnot, ki aplikeshon, ki skhim sorkar bad kiwei kiwei ki jingshakri ba donkam.

U Conrad u la ong ruh ba ka CM Connect ka dei halor ka jingpynroi ia ka kolshor jong ka jingsngap bad ka jingiashim bynta ban pynthikna ba ka jingsynshar kan iai long kaba pynshong nongrim ha ki briew.

Haba kren sha ka kynhun ka CM Connect, u Conrad u la kyntu ia ki ban shakri ia ki nongshong shnong da ka jingburom, ka jingsbun bad ka jingsngewthuh jingmut.

“Haba phi kren sha ki paidbah, phi kren na ka bynta jong nga. Ki nongshong shnong kiba leit sha ka ophis CM Connect ki dei ban sngew ba la pdiang sngewbha ia ki. Lada ki sngew ba la iehnoh bein ia ki, kumta ruh kane ka jingthmu ka long kaba la shah rem lypa,” u la ong. U la pynkut da kaba pynkynmaw ia ka jingthmu ka jong u ban pynlong ia ka jingsynshar kaba kham pynsuk, kaba khuid ba suba bad kaba shimkhia lyngba ka CM Connect da kaba kdew ba watla ka jingleit ka lah ban shim por hynrei ka thong ba kongsan ka long ba man ki jingshakri jong ka sorkar ka dei kaba lah ban ioh lyngba kine ki centre.

Ha kane ka sngi la ia don lang ruh u Thomas A. Sangma, Lamphang ka iing dorbar thaw ain ka Jylla, u Vibhor Aggarwal, IAS, Deputy Commissioner, West Garo Hills, u Bah Banteilang J. Kharshandi, MCS, Nodal Officer ka CM Connect ha ryngkat ki heh ophisar, ki nongmihkhmat ka CM Connect bad ka team the MeG.

Ha ka jingkren, u Thomas A Sangma u la khot ia kane ka jingplie kum ka khyllipmat jong ka jingkmen bad ka jingsngew sarong, bad ong ba kane ka centre ka long u mawjam ba kongsan na ka bynta ka synshar khadar hapoh ka thain bad ha ka jylla hi baroh kawei. U la ban jur ba ka jingthmu jong ka CM Connect ka long ban weng ia ka jingiapher hapdeng ka sorkar bad ki nongshong shnong da kaba pynskhem biang ia ka jingkut jingmut jong ka jylla ia ka synshar paidbah kaba rit paid, ka jingsynshar kaba khuid ba suba bad kaba shai bad ka jingiatreilang kaba don jingmut bad ki nongshong shnong.

U la bynrap ba kane ka centre kan pynkupbor ia ka imlang sahlang baroh kawei, ki nongshong shnong, ki samla, ki nongrep, ki nongsengkam sengjam bad ki kynhun ka imlang sahlang da kaba plie ia ka rynsan ban pynpaw ia ki jingeh, ban kylli jingkylli bad ban wad ia ki lad ki lynti ban pynbeit lyngba ki bor sorkar.