Plie u Myntri ka Sorkar Pdeng ia ka Regional Cancer Centre ha NEIGRIHMS, jngoh iaka Aspirational District

Syllad | The Rising MeghalayaOctober 15, 2023

U Myntri ka Tnat ka koit ka khiah ka Sorkar Pdeng u Dr Mansukh L Mandaviya haka 14 tarik Risaw u la plie ia ka Regional Cancer Centre ne ka jaka sumar ia kiba pang bampong kaba 252 jingthiah hapoh North Eastern Indira Gandhi Regional Institute of Health and Medical Sciences (NEIGRIHMS) ha ka nongbah Shillong.

Une u Myntri u la plie paidbah ruh ia ka Under Graduate Medical College ba thymmai, ka Building ba thymmai jong ka Nursing College, ki Hostel, ka Modular OT bad Guest House ba thymmai hapoh kane ka Institute kumjuh ka jingbuh ia u mawnongrim na ka bynta ka jingtei ia ka  Critical Care Block kaba don 150 tylli ki jingthiah ha ka jingiadon ryngkat lang u MLA ka Mawryngkneng u Bah Heaving Stone Kharpran bad u Director ka NEIGRIHMS u Prof. Nalin Mehta, ki nonghikai, bad ki samla pule ka Institute bad kiwei kiwei.

Haba kren ha ka jingplie pliang ha kane ka sngi u Dr Mandaviya u la ong, “Kine ki jaka aijingsumar bathymmai ka NEIGRIHMS kin pynioh ia shibun ki lad jingsumar na ka bynta ki paidbah nongshong shnong jong ka thain shatei lammihngi (Northeast) baroh kawei. U la ong ruh ba na ka liang ka Sorkar Pdeng ka don ia ka jingkut jingmut ban kyntiew shuh shuh ia ki jaka treikam kiba iadei bad ka koit ka khiah, kata naduh ki jingtei bad kiwei pat hapoh kane ka thain khnang ban lah ban pynioh ia ki lad jingsumar kiba paka.”

Une u Myntri u la ong ruh ba kine ki jaka treikam bathymmai hapoh NEIGRIHMS kin iarap shibun ban wanrah bad pynneh ia ki riewshemphang ha ki lad ai jingsumar ha ka thain Northeast. Nalor kata u la  iaroh ruh ha kaba iadei bad ki rukom treikam bad ka jingkhuid jingsuba jong ka NEIGRIHMS bad pynpaw  ruh ba ka Sorkar ka don ia ka jingkut jingmut ban nangkyntiew shuh shuh ia ki jaka treikam ha kane ka jaka khnang ba kane kan long kum ka jaka pdeng na ka bynta ki kam aijingaisumar, ki jingwad bniah bad ka jingai jinghikai ia kito kiba trei ha ki kam ai jingsumar hapoh kane ka thain.

Nalor kata u Dr Mandaviya u la ong ba ka Sorkar Pdeng ka la shim ia ki sienjam kiba kyrpang ha ka liang ka koit ka khiah ha ka rukom kaba paka. “Ngim shym la tei tang ia ki jaka aijingsumar bad ia ki jingdonkam kiba katkum kane ka juk, hynrei ngi pynleit jingmut ruh ha kaba iadei bad ka jingpynbun ia ki doktor bad ki nos.Ha kine ki khyndai snem kiba la leit, ka jingdon jong ki  medical college hapoh ka ri ki la kiew sha ka arshah. Ngi la tei hauh 1,70,000 tylli ki Health & Wellness Centre ha kylleng ka ri. Ngi dang tei ruh kawei ka Critical Care unit ha man ka distrik jong ka ri”, u la ong shuh shuh.

Haba kren halor ka jingkiew shakhmat ha kaba iadei bad ka jingtei ia ki jaka treikam kiba iadei bad ka koit ka khiah hapoh ka ri, une u Myntri ka sorkar pdeng u pyntip ba ka jingdon jong ki MBBS seat hapoh kari ka la kiew na ka 50,000 sha ka shi lak hynniew hajar ngut tang hapoh ki khyndai snem, kata kaba la sdang naduh u snem 2014.Ban pynioh ia ka pule puthi kaba paka la thaw ruh ia ka National Medical Commission (NMC).

Katba na ka liang Director ka NEIGRIHMS u Prof Nalin Mehta ha ka jingkren ula ong ba kine ki jaka treikam kiba thymmai kin kyntiew shibun ha kaba iadei bad ki lad aijingsumar hapoh NEIGRIHMS bad kan kyntiew ruh ia ka jingdon ki seat pule MBBS bad B.Sc. Nursing course ha Meghalaya.U la ong ruh ba da ka jinglah ban kyntiew ia ki jaka treikam kiba iadei bad ka koit ka khiah hapoh kane ka thain Northeast kiba bun ki briew kim donkam shuh ban leit sha kiwei pat ki bynta jong ka ri na ka bynta ban ioh ia ki lad aijingsumar.

Haka sngi ba bud, kata haka Sngi U Blei, u Dr. Mansukh L. Mandaviya ula leit jngoh iaka Ri Bhoi District, kaba la ithuh kum ka Aspirational District.

La synran ia u Dr Mandaviya da ka Myntri ka tnad ka Koit ka Khiah Dr. Ampareen Lyngdoh, Deputy Commissioner of Ri Bhoi, Arpit Upadhayaya, Ri Bhoi Superintendent of Police, Giri Prasad, MD, NHM Ramkumar S bad kiwei kiwei.

Kane ka jingleit jngoh u Myntri Sorkar pdeng kala sdang da kaba leit jurip iaka Health and Wellness Centre ha Umsaw Nongkharai, ha kaba u Dr Mandaviya ula phylliew jingmut bad ki nongtrei ASHA, ki smart card holders. Ka review meeting halot ka Aspirational District kala long ha conference hall u DC Nongpoh.