Plie u Myntri ka sorkar pdeng ia ka “Meghalaya Pineapple Festival 2023” ha ka nongbah  Delhi

Syllad | The Rising MeghalayaAugust 18, 2023

U Myntri ka sorkar pdeng uba khmih ia ka tnat  Rural Development & Panchayati Raj, u Giriraj Singh u la plie ia ka tamasa  “Meghalaya Pineapple Festival 2023” ba la khot pynlong da ka sorkar Meghalaya mynta ka sngi ha ka jingialang kaba la long hapoh Dilli Haat, INA, New Delhi ha ka jingiadon lang u CM ka Meghalaya u Conrad K Sangma, Ka Myntri ka tnat Agriculture and Farmers ka Dr. Ampareen Lyngdoh, u Myntri ka tnat Tourism Department u Bah Paul Lyngdoh, u Commissioner & Secretary ka tnat Agriculture and Farmers’ Welfare ka sorkar  Meghalaya u Dr. Vijay Kumar D, IAS bad ka Secretary ka tnat Agriculture and Farmers’ Welfare Department sorkar jylla, ka Kong  Isawanda Laloo IAS.

Na ka liang u Giriraj Singh ha ka jingkren u la pynpaw halor ka jingkongsan jong ka jingiapher ha ka rukom rep rukom riang bad ki jingiatreilang hapdeng ki jylla jong ka ri, ha kaba u la ai khublei kyrpang ias ka sorkar Meghalaya halor ka jingshim ia ka sienjam ban pynlong ia kaba kum kane ka tamasa.

U la ong ba kane ka dei u mawjam sha ka lynti kaba dei na ka bynta ban kyntiew ia ki mar rep lyngba ka jingiatreilang hapdeng ki jylla bad ka ban kyntiew ia ka ioh ka kot jong ki paid nongrep. U la kdew ruh ba ka jingiapher ha ka jinglong ki jaka rep hapoh ka ri ka long kum ka spah bah ka ban plie ia ki lad ki kabu.Kum kine ki tamala ki pynshlur ruh ia ngi ba ngin wad ia ki lad ki lynti hapoh la ki jong ki jylla, ban tip ia ka rukom rep bad ban pyntreikam ia ki na ka bynta ka jingmyntoi jong baroh.

Knieh ki nongrep Soh Trun ka jylla Meghalaya wat ia  ki iew bar ri

“U Sohtrun (Pineapple) na Meghalaya u dei uba la pawnam bha ha kaba iadei bad ka jingbang jingthiang bad ka jingbha. Kane ka rynsan ym tang ba ka plie ia ka rynsan ban pyni ia kine ki mar rep, hynrei ka kdew ruh halor ka jingtrei shitom bad mijot jong ki nongrep.

Katba na ka liang u CM ka Meghalaya u Conrad Sangma ha ka jingkren u la ong ba kane ka tamasa ka long kaba kongsan ha ka jingiaid lynti ka jong ngi ban pynpaw ia ka kolshor ka jylla bad ia ka rep ka riang bad ka jingiatylli. U la ong ruh ba kane ka Festival ka long kham palat ban ia kaba la rakhe halor ka jingpynmih ia kine ki mar rep na ka jylla, hynrei ka dei ruh ka rynsan ban iasam ia ka jingiapher ka kolshor jong ngi kumjuh ha ka liang ka rep ka riang bad ka jingiatylli kaba tehsong ia ki briew jong ngi.

“Kine ki sohtrun kiba ngi pynmih kim dei satia tang ki soh, hynrei ki pyni ruh ia ka jingseisoh jong ka jaka, ka jingtrei shitom jong ki nongrep bad ka jingriehspah kaba hiar pateng. Nga sngew sarong ruh ban pynpaw sha phi baroh ba da ka jingtrei borbah jong ka sorkar Meghalaya bad baroh ki kynhun kiba don bynta, u sohtrun na ka jylla jong ngi la pyniaid iew ruh shaduh shapoh Dubai Kuwait bad Sharjah,” ong u CM Conrad Sangma.

Ban kyntiew ia ka iew ka hat na ka bynta u Sohtrun u CM u la ong ba u la plie ruh ia ka  processing unit ban saindur ia u Sohtrun ha Umdihar IVCS hapoh ka shnong Umdihar,  Ri Bhoi district. Shuh shuh u la ong ruh ba ia u sohtrun na ka jylla la thung khlem da pyndonkam satia ia kino kino ki kynhun dawai.

Ha kajuh ka por u la ai khublei kyrpang ia ka sorkar India halor ka jingplie ia ki lad ki lynti ban pynpaw ia kine ki jingjop bad ia ki jingangnud.