Plie u MP Rajya Sabha iaka gallery haka shnong Thangbuli

Syllad | The Rising MeghalayaJune 7, 2025

U MP ka Rajya Sabha u Dr Wanweiroy Kharlukhi haka 6 tarik Jylliew ula plie paidbah iaka jaka shong peitkai ne Gallery ka madan ialehkai phutbol jong ka shnong Thangbuli kaba hap hapoh ka Amlarem Sub Division, West Jaintia Hills District.

Ia kane ka Gallary, la tei lyngba ka skhim MPLADS (RS) haka jinglut kaba T.10,00,000/.

U MP haka jingkren u pynpaw ka jingkmen namar kaei kaba ula kular iaka shnong Thangbuli, ula pyndep ïa kata ka jingkular bad ula kular shuh shuh ban kyrshan iaka Dorbar Shnong naka bynta ka jingbha jingmiat jong ki nongshong shnong bad ka imlang sahlang.

Ha kane ka sngi la donlang ruh u MDC ka JHADC u Ma Medling Swer, u MLA barim ka thain Ma Stephanson Mukhim, u Waheh shnong Thangbuli Ma Disuk Tariang nalor kiwei kiwei ki nongialam shnong bad riew paidbah ka shnong.

Iaka jingialang kaba la pynlong ha Indoor Hall ka Youth Social Welfare Club bad la pynphuh pynphieng da ki jingshad jingrwai naki khynnah ka skul Amwi Higher Secondary School bad VO Thangbuli, ha ryngkat ka jingtem jingtem na ka Rislin Musical Band na Thangbuli.

Hadien ka jingplie paidbah iaka Gallery, la pynlong ruh ïa ka jingïalehkai phutbol paralok hapdeng ka Hynriam Sport Club bad ka Sohlawiat Sport & Cultural Club kiba dei ki club napoh ka shnong Thangbuli.