Plie u MP ka Shillong ia ka ‘XV State SNAI Biennial Conference ba ar sngi jong ka TNAI

Syllad | The Rising MeghalayaMay 29, 2025

U MP Lok Sabha na Shillong u Dr Ricky AJ Syngkon haka sngi Balang u la plie paidbah ia ka jingialang ba ar sngi jong ka “XV State SNAI Biennial Conference 2025” ba la khot pynlong da ka Trained Nurses Association of India (TNAI), Meghalaya State Branch hapoh Lariti International Performing Arts and Culture Centre ha Mawkasiang, New Shillong Township.

Ka jingrakhe mynta u snem ka long halor ka phang “Learning Today, Leading Tomorrow: A Journey of a Nursing Student”.

Da kaba ithuh ia ki nurse kum u budlum jong ka tnad aijingsumar, u Dr Rikcy ha ka jingkren kum u kongsan u la pyrto halor ka jingkongsan ha kaba pynlong ia kum kine ki jingialang ki ban pynkupbor ha ka jingai jingshakri jong ki nurse lyngba ka jingsamia ki jingtip bad ka jingiatreilang. 

Une u MP u la ong ruh ba ki nurse ki dei kiba don ha baroh ki jaka naduh kiba kyndong tam ha ka jingai jingshakri ha ka liang ka koit ka khiah.

U la kdew ruh ba ha ka por jong ka khlam Covid-19 dei ki nurse kiba la mad ia ki jingeh jingtynjuh ba khraw kaba pynpaw ia ka jingshlur ba maian, ka jingtbit ba kyrpang bad ka jingiai shah kaba kham phylla hapdeng ka jingtieng jingsyier, ka jingbym thikna bad ka jingtlot jingswai namar ka jingbun kam.

U Director ka NEIGRIHMS u Prof Nalin Mehta uba la ia don lang ha kane ka jingialang ha ka jingkren u la ong ba kane ka jingialang ka dei ka jingrakhe ia ka jingaiti lut, ka jingieit, ka jingnang jingtip bad ka jinglong nonglamkmat ha ki kam aijingsumar.