Plie u ma Lahkmen saw tylli ki jingtei thymmai, pynbna ban sdang noh ka Commerce Stream ha Nongtalang College

Syllad | The Rising MeghalayaJanuary 12, 2023

Kan long ka sngi ban sah jingkynmaw iaka shnong Nongtalang baroh wei kumjuh iaka Amlarem Constituency hadien ba ka lah ban plie iaka building kaba thymmai jong ka Nongtalang College  bad ka Nongtalang Government Secondary School haka sngi Balang.

Ki jingtei ba thymmai kiba la plie u Ma Lahkmen Rymbui ki kynthup iaka Academic Block, Library Block bad ka Science Block jong ka Nongtalang College.

Iaka Academic Block la pynsah nam ha u wei na ki nongseng (L) John Deng Pohrmen bad ka Library Block la pynsahnam ha (L) Chuidu Lyngdoh Rad.

Pule | Hapoh 30 bnai yn pyndep iaka Residential Skul ha Umladkhur: Lahkmen

Kane ka jaka kaba la tei iaka building ba pura ka kolej ka ba lah ban iohi kyndiang na ka surok bah Dawki Amlarem haka jaka kaba la tip kum ka Kyrmia Jongïaw, Nongtalang.

Ia ka jingtei ia kine ki building ban pynbha iaka kolej la bei pisa da ka RUSA 1.O bad RUSA 2.O ban kyntiew kyrdan ïaka kolej sha ka Model Degree College.

Katba ha Nongtalang Government Secondary School u ma Lahkmen ula plie iaka Administrative Building Cum Auditorium ka skul.

Pule | Plie u Lahkmen iaka Science Block ka Sohkha Govt Higher Secondary School

U Ma Lahkmen uba long u myntri sorkar bad MLA ka Amlarem Constituency haba kren kum u kongsan ula pynbna ruh ba ka sorkar kala thung nonghikai sa san ngut ha Nongtalang College lyngba ka People’s College bad na ka aiom ban wan yn sdang noh iaka Commerce Stream ha Nongtalang. Ka tulop na ka bynta ki nonghikai haka shi snem kala kynjoh 50 lak tyngka.

Ula ïathuh ba u don bynta bad ka kolej kumba 18 snem bad udei u President barim jong ka Governing body bad ha u snem 2018 ula resaiñ ïaka kam President ban shim bynta haka kam saiñ hima sima.

Ula pynpaw ka jingsngew nguh ïaki ophisar ba lyngba ka RUSA 2.O la kyntiew kyrdan iaka ïaka kolej ba kan long kum ka nuksa ia kiwei ki kolej bad ula ong ba udei uba donbok namar hashwa ba un long Myntri jong ka sorkar Jylla kane ka kolej ka la ïoh ïaka kyrdan Grade B naka NAAC (National Assessment and Accreditation Council), kaba mynta ruh ka bat ia kane ka kyrdan.

Pule | Mano na ki Home Minister ka Jylla ba nud buh da ki phew tylli BOP ha ki thain khappud ong u ma Lahkmen

“Ka thong jong nga ha kine ki san snem ban wan, ka long ba nga kwah ban ïohi ba ka Nongtalang College kan sdang noh ïaka Degree Course haka BSc bad ngan ïaleh ban pynïoh ïa kane namar kadei kawei na ki kolej hapoh ka Jylla haki thaiñ nongkyndomg kaba la biang ki jingdonkam jong ka”, la ong u Ma Lahkmen.

U Ma HL Giri president Governing Body Nongtalang College ula ïathuh ïaka jingsdang jong ka kolej naduh u snem 1988 da ki rangbah bad Dorbar shnong Nongtalang hapoh ka jingïalamu (L) J D Pohrmen, Deputy Chief Minister barim ka sorkar Meghalaya bad u (L) Chuidu Lyngdoh Waheh shnong barim ka Nongtalang.

Ula ïathuh ïa kane kolej la seng halor ka jingthmu ban kyntiew bad pynroi ïaka jingnang jingstad haki kyrdan kiba kham shalor haka shnong Nongtalang bad ka thaiñ War Jaintia baroh kawei khamtam na bynta kito ki khynnah kiba wan na ki longïing kiba duna ka ïoh ka kot ki bym don lad ban pule sha Shillong bad kiwei kiwei ki sor.

Kiwei kiwei kiba kren ki dei  u Waheh shnong u Bah Min Lyngdoh, u Headmaster ka Nongtalang Secondary School bad na u Bah Kmen Myrchiang Secretary Governing Body. Iaka jingialang la pynïaid da ka Dr Solony Bareh bad Dr Spaiñlinmi Lapasam bad la ïoh ka jingkren pdiang burom na u Principal ka Nongtalang College u Dr. Ryan R. Kharkongor haka jingïadonlang ki nongshong shnong, ki kmie ki kpa, ki nonghikai bad ki khynnah.