Plie u ma Kyrmen Shylla iaka jingkieng iaid kjat ba shongdor T.95 lak ha Tuber Kmaishnong

Syllad | The Rising MeghalayaJanuary 31, 2024

U Myntri ka sorkar Jylla uba long ruh u MLA Khliehriat, u Ma Kyrmen Shylla haka 31 tarik Kyllalyngkot ula plie paidbah iaka jingkieng iaid kjat (Suspension Bridge) haka shnong Tuber Kmaishnong, East Jaintia Hills District kaba la shna halor ka wah Myntdu.

Kane ka jingkieng ka ban kam sha shilliang ka wah Myntdu, ka don haka bynta kaba ka shnong Tuber Kmaishnong kaba la ai jingiada iaki dohkha kaba la pynkylla Fish Sanctuary ha Madan Dai Cha (Phase I).

Kane ka jingkieng kaba jrong 130 Meter, la pyntrei lyngba ka skim bylla 100 sngi, Mahatma Gandhi National Rural Emloyment Gaurantee Act 2023-2024, kumjuh ka District Mineral Fund, PMKKKY bad MBDA Fund. Baroh ka jinglut jingsep kala kynjoh sha ka T.95 lak.

U Ma Kyrmen Shylla haka jingkren ula iaroh iaki nongialam Shnong kiba don ka mynsiem iatreilang na bynta ka bha ka miat bad ka roi ka par jong ka Shnong.

Ula ong lyngba ka jingpyndep ia kane ka jingkieng kan kyrkhu ymtang iaki nongrep, hynrei ka long ruh ka jingmyntoi iaki nongshong shnong ban kyntiew iaka kam jngohkai pyrthei.

U Waheh Shnong Tuber Kmaishnong Ma Micky Lyngdoh ula ong kane ka jingkieng kadei ka jingangnud kaba la slem bha jong ki nongrep ka shnong, khamtam haka ban rah ka rong iaki mar rep mar riang kaba ki nongrep ki hap ban kam shilliang iaka wah Myntdu.

Ha kane ka sngi la donlang ruh u Deputy Commissioner ka East Jaintia Hills District u Abhilash Baranwal IAS, u BDO Khliehriat u Dr. Tammiyaki Shylla, u Additional Deputy Commissioner ka East Jaintia Hills District G. Warjri, Kong SD Shylla Tourism Officer, ki nongshong shnong bad kiwei kiwei.