Plie u Kyrmen Shylla iaka madan artificial turf ba nyngkong ka Khliehriat

Syllad | The Rising MeghalayaJanuary 12, 2023

U Kyrmen Shylla Myntri ka tnad Social Welfare, Disaster Management bad Revenue ula plie paidbah ia ka madan Artificial Turf ne madan phlang plastic ba nyngkong ha Deinchynrum, Khliehriat haka sngi Palei.

Ia kane ka madan la tei naka District Mineral Foundation Trust (DMF) kaba la kot T. 2.5 klur bad na u Kyrmen Shylla ula synniang T.20 lak tyngka.

Kane ka madan ka dei kaba la ai sngewbha u Ma Kor Sympli bad ka shnong Deinchynrum sha ka synjuk East Jaintia District Sports Association (EJDSA). Bad ha kane ka kynti da ka jingshimkhia u MLA ka thain la shna ia kane ka madan tang lai bnai bad kaba sah ka long ban shna iaki nala ki light bad ki jaka shong paidbah kiba paka.

U Deputy Commissioner ka East Jaintia Hills District u Abhilash Baranwal, IAS haka jingkren ula ïathuh ula ïathuh ba la sdang ban shna ïaka madan ha u bnai October 2022 bad ula ïathuh ba kane ka madan kadei ka jingangnud ki paidbah ka District.

U Waheh Shnong ka Deinchynrum u Ma Wilbert Nongtdu ula ïathuh ba ïaka madan la ai sngewbha da u Kpa jong u Ma Kyrmen Shylla, u Ma Kor Sympli bad khyndiat na ka shnong Deinshynrum naduh ki por mynshwa sha ka Association bad u khun jong u la pyndep ïaka jingsiang madan Artificial Turf.

“Nga sngewkmen ba ki nongpynīaid jong ka Association haduh mynta mynne kim shym la klet ïa u synñiang u bynhei jong i Pa jong ngi ban kyntiew ïaka kam ïalehkai jong ki khun samla ka District”, la ong u ma Kyrmen Shylla.

Ula iaroh ia u Deputy Commissioner bad ka ophis jong u, ki dkhot ka Association kiba la ai ka jingïatreilang miet la sngi naduh u bnai October 2022 ba la sdang ïaka jingsiang phlang ïa kane ka madan.

“Nga kyrmen ba da ka jingdon kane ka madan kan pynmih shibun ki sap kiba nylla bad ki ban mihkhmat iaka district sha ka National bad International Level haka kam ialehkai football,” la ong u Kyrmen bad khot wer iaka jingïatreilang ban pynmiat pynbha ïaka District kaba dang donkam shibun ki jingïarap khamtam ban ïatreilang haka ban kyntiew ïaki jaka jngohkai pyrthei hapoh ka District khnang ba ki samla bym don kam don jam bad lyngba ka kam jngohkai pyrthei kin lah ban pyndap pynbiang ïaka ïing ka sem jong ki.

U Ma Kyrmen Shylla ula ong, “Katba nga dang long u nongmihkhmat jong ka 6-Khliehriat Constituency nga kular ba ha man ka 5 snem ngan wanrah kawei ka madan plastik ne Artificial Turf hapoh ka Constituency bad ka District East Jaintia Hills hi baroh kawei.”

Ha kane ka sngi u MLA ula pynkup burom ruh ïaki 7 ngut ki rang bad ki thei samla kiba la wanrah nam rah burom ïaka District haka lympung ïalehkai North East Olympic Games 2022 da ki khunsam sah kynmaw bad ka song pisa kaba 10 hajar tyngka sha kiba ïoh takma Ksiar, 7 hajar tyngka takma Rupa bad 5 hajar tyngka takma Rnong lyngba ka skhim District Sports Promotion Society.

Kine ki 7 ngut ki rang bad ki thei samla ki long Eleven Dkhar Athletic uba la ïoh ïaka takma ksiar, Rupa bad rnong, Bhalang Shadap Boxing uba la ïoh ïaka takma ksiar, u Damewankio Suiam Cyclists uba la ïoh ïaka takma rupa, Nicolast Syrti Cyclists ba la ïoh ïaka takma Rnong, Nelson Rymbai Football ba la ïoh ïaka takma rupa, Shining Lamurong Wrestler ba la ïoh ïaka takma rupa bad Fivestar Bareh Wrestler ba la ïoh ïaka takma rnong.

Ha kane ka sngi la sam ruh ïaki tiar ïalehkai sha ki Association bapher bapher ka District.

Hadien ka jingïalang la pynlong ïaka jingïalehkai paralok hapdeng ki MLA-MDC ba rim ba mynta pyrshah ïaki waheh shnong bad ki dkhot ka EJDSA bad ha kane ka jingïalehkai la jop da ka kynhun ki MLA-MDC da ka jingïashut Penalty.