Plie u Kyrmen ia ka madan Futsal ha Sohkymphor

Syllad | The Rising MeghalayaApril 30, 2025

Ha ka jingpyrshang ban kyntiew ia ki kam ialehkai sports hapoh ka District bad ban ai rynsan ia ki nongialehkai sports ba kin kyntiew ia ki sap ki phong bad ban pynshlur ia ki samla ba kin iashim bynta ha ki kam ialehkai, ha ka 29 tarik Iaiong la plie paidbah ia ka madan Futsal ba la bei tyngka na ka District Mineral Foundation (DMF) ha ka shnong Sohkymphor, Wapung C&RD Block da u Myntri Sorkar Jylla bad MLA ka Khliehriat u Bah Kyrmen Shylla.

Haba kren ha ka jingialang, u Myntri u la ai khublei ia baroh kiba don bynta ban pynlong ia kane ka project kaba jop da kaba banjur ruh halor ka jingkongsan jong ka jingialehkai sports ha kine ki sngi kiba mynta namar ka jingkiew jong ki kam sniew hapoh ka imlang ka sahlang ha kaba bun na ki khynnah samla ki la ngop ha ki jingmlien ba sniew.

U la ong ba na ka liang ka sorkar ka la shim ia ki sienjam bapher bapher da ka jingthmu ban pynshlur ia ki samla ba kin iashim bynta ha ki kam ialehkai sports kum ka phutbol bad kiwei pat da kaba ban jur halor ka jingdonkam shuh shuh ia ki jingtei na ka bynta ki kam sports hapoh ka District ki ban plielad shuh shuh ia ki samla.

Nalor kata u la kdew ruh ba ka madan ialehkai Artificial Turf ha ka shnong Deinshynrum ka la sakhi ia ka jingkiew sted ha ka jingdon jong ki lympung ialehkai phutbol bad ki player kiba pyndonkam ia ki jingtei ba la pynbiang hapoh ka thain bad pynpaw ruh ia ka jingkyrmen ba ka jingplie ia kane ka madan Futsal ha Sohkymphor kan pynshlur bad pynmih shuh shuh ia ki samla donsap. U la kular ruh ba kin dang bteng ban shna shuh shuh ia kiba kum kine ki madan ialehkai hapoh ka District lyngba ka DMF na ka bynta ki jingmyntoi jong ki samla ka District.

U Deputy Commissioner, EJHD u Shivansh Awasthi ha ka jingkren u la ai khublei ia baroh kiba don bynta ha kane ka project da kaba bynrap ruh ba kane ka Madan Futsal kaba dang plie thymmai la khmih lynti kan plielad plie lynti ruh ia ki samla trai shnong ba kin lah ban wanrah ia ka ioh ka kot na ka bynta ka shnong ka thaw.

U DC u la ban jur ruh ia ka jingdonkam ban pynneh pynsah ia kane ka jingtei kaba thymmai khnang ban pynthikna ia ka jingneh slem bad ka jingseisoh da kaba kyntu ruh ia ki bor shnong kiba pyniaid ia kane ka madan Futsal ban mang katto katne ka pisa ba la pynmih na kane ka madan na ka bynta ban leh ia ki kam pynbha khnang ban pynthikna ba kane ka madan kan iai bteng ban pynioh jingmyntoi ia ki samla bad ia ka shnong hi baroh kawei.

Kiwei pat kiba la aijingkren ha kane ka sngi ki kynthup ruh ia u Deputy CEM ka Jaintia Hills Autonomous District Council (JHADC), u Bah Lasky Rymbai, Deputy Chairman JHADC u Bah Wailadameshwa Siangshai ha ka jingiadon lang ki Rangbah Shnong, nonghikai, ki samla pule bad ki nongshong shnong ka thain.

La pynphuh pynphieng shuh shuh ia kane ka prokram da ki jingrwai bad jinshad tynrai na ki khynnah skul bad ki dkhot SHG jong kane ka shnong.