Plie u DC Jowai iaka ïing sumar ia kiba shitom haka bor pyrkhat ha Sabahmuswang

Syllad | The Rising MeghalayaJune 28, 2023

U Deputy Commissioner, West Jaintia Hills District Bah BS Sohliya ula plie paidbah ïaka ïing sumar iaki briew kiba shitom haka bor jingmut jingpyrkhat kaba tip kum ka “Half Way Home for Rehabilitation of People Living with Mental Illness” ha Sabahmuswang, West Jaintia Hills District.

Ïa kane ka ïingsah la bei pisa da ka tnad Directorate of Social Welfare jong ka sorkar jylla bad yn pynïaid da ka Society for Urban & Rural Empowerment (SURE).

Haka jingïalang plie la iadonlang ka Kong CD Lyngwa Director of Social Welfare, ka Kong J. Synnah District Social Walfare Officer, ka Kong CW Lyngdoh DSP West Jaintia Hills District, ka Dr. AN Paswet Psychiatrist, u Dr. HH Mohrmen Secretary of SURE, Waheh Shnong Sabahmuswang Tellme Phawa bad kiwei kiwei.

Ka Kong N Shylla Project Coordinator HWH SURE, kala ïathuh ba ha kane ka ïing sah yn pdiang ïaki nongpang kiba la pyndep ïaka jingshah sumar na Sanker lane MIMHANS shwa ba kin leit phai sha la ki ïing ki sem jong ki.

Shuh shuh ha kane ïing sah yn don 16 ngut ki nongtrei ki ban ai jinghikai kum ki jait shna jingshna bad counseling nalor ki doctor ki ban wan jngoh ïaki nongpang.

U Deputy Commissioner BS Sohliya haka jingkren ula ai khublei kyrpang ïaka Dorbar Shnong Sahbahmuswang namar ka jingsngewthuh ïaka jingdonkam bad ka ai ka jingkyrshan bad NOC ban pynïeng ïa kane ka ïing.

Ula kyntu ïa kiwei ki shnong ban bud nuksa bad long kiba shnong kiba kloi ban pdiang ïa kum kine ki jaka sah khamtam ïa kito ki nongpang kiba shah ktah haka bor pyrkhat pyrdaiñ.

Ula ong mynshwa ki briew kiba don jingduna haka bor pyrkhat pyrdaiñ ki ju shah niewbeiñ haka imlang sahlang bad don ki por ki im jynjar kumno ban pynïadei bad ka imlang sahlang bad don ruh ka khep ba kine nongpang ki shah set la ymdei ha ïing hynrei haki along hynrei mynta ym long shuh kumta namar ba ki la don ki lad kiba biang ban ai jingsumar ïa kito ki briew kiba pang ha ki jingmut jingpyrkhat.

Ula kular ba ka ophis jong u kan ai ka jingïatreilang kumno ban pynbha shuh shuh ïa kane ka ïing sah bad ba ki nongtrei ruh kin ïoh mynsiem.