Plie u CM ia ka Williamson Sangma State Museum kaba la shna pynthymmai katkum ka juk

Syllad | The Rising MeghalayaJune 26, 2025

U Myntri Rangbah ka Jylla u Conrad K Sangma haka sngi Balang u la plie ia ka Williamson Sangma Meghalaya State Museum kaba la dep ban shna pynthymmai katkum ka juk kaba mynta ha ka jingialang kaba la long hapoh Soso Tham Auditorium, Shillong.

Ha kane ka jingplie la ia donlang ruh u Myntri ka Tnad Arts & Culture u Bah Paul Lyngdoh, u Myntri ka tnad Bording u Abu Taher Mondal.

Ia kane ka Museum la pynwandur thymmai pura katkum kane ka juk kaba mynta bad ka ban pynioh ia ka jingshem kaba pynsngewtynnad bad kaba don ruh ia ki kor teknoloji kaba kynthup ia ka QR-based exhibits bad ki jingpyni lyngba ki kor digital.

Haba aijingkren u Myntri Rangbah u la pynpaw ba kane ka sienjam ka dei shibynta jong ka jingiohi jngai ban rakhe, ban buh jingthoh bad ban pynneh pynsah ia ka jingriewspah ka jylla ha ka liang ki jingdon jingem kiba hiar pateng katkum ka kolshor ryngkat ka jingkyntiew ia ka ioh ka kot kaba neh.

“Kam dei satia tang ka jingpyni ia ka jinglong kyrpand bad ban pynneh pynsah ia ka.Ka jingkylli kaba heh ka long kumno ba ngin lah ban pynlong ha ka rukom kaba pynitynnad bad pynwandur bha, kumno ba ngin pynrung ia ka kolshor barim bad pynkylla ia ka sha ka ioh ka kot,” u la ong.

U la pynbna ba ka Tnad pule puthi kan sa pynmih ia ka jingbthah na ka bynta baroh ki khynnah pule ba kan long kaba kongsan ba kin leit jngoh ia kane ka Museum, da kaba kdew halor ka jingkongsan ban pynngam ia ka jingsngewthuh ha kaba iadei bad ka kolshor bad ka jingiaroh hapdeng ki samla.

Ban nangpyniar shuh shuh, ia kaba kum kane ka Museum yn sa tei ha kylleng ka jylla, ka ban sdang na Tura. Ia ki jingpynwandur (Design) la dep ban mynjur na ka bynta ki project kiba thymmai ha kiwei pat ki District Headquarter ba kongsan.

Nalor kata u la pyntip ba lyngba ka Chief Minister’s Research Grant (CMRG), ka jingwad bniah halor ka kolshor bad ka roi ka par la dep ban sdang. U la ong ba ka jingkhmih bniah halor ki jingwad bniah ka la pyni halor ki jingmih kiba phylla, kata kynthup ia ka AI-based translation bad ki tiar Phonetic na ka bynta ki ktien tynrai, ka jinglap bad ka jingbuh jingthoh ia ki 71 tylli ki jingialehkai tynrai jong ki jaidbynriew Garo bad ka jingpyrshang ia ki lad kiba iadei bad ka Archaeological Tourism ha Rilum Garo, bad ki mawbynna kiba rim kiba lah ban dei naduh ki 1200 BC.

“Ia kine ki jingshem yn sa lum thup bad ia kiba yn pynioh sha ki paidbah lyngba ki kot lyngkdop bad ki jingthoh ha ki jingpule khnang ban nangpynkhlain ia ka jingnang jingtip kaba iadei bad ka kolshor ha ka jylla,” u la ong.

Kumjuh haba kren halor ka jingpyrshang jong ka jylla ban thaw ia ka ioh ka kot da kaba kynthup ia ki lad sengkam seng jam kiba don jingiadei bad ka kolshor, u CM u la ong ba lyngba ka PRIME Program, ki nongseng kam la jong ki la ioh ia ka jingkyrshan ban pynmih ia ki jingbuh sahkynmaw bad ki jingthain kiba kordor.

U la ong,” Kiwei k ri kum ka Vietnam ki la pyniaid iew ia ki mar kiba la shna na ki siej, ma ngi ruh ngi don ka lad ka kabu kaba biang bha ban pynmih ia kiba kum kine ki karkhana kiba don ia ka jinglong tynrai,”

Haba kdew halor ka OTT Platform “Hello Meghalaya” ba la pyniaid da ka sorkar, u Conrad u la ong ba kane ka rynsan ka la long ka atiar kaba kongsan ban buh ia ki jingtip bad ban kyntiew ia ka kolshor jong ki trai shnong, ka put ka tem, ka histori lyngba ki phlim, ki documentary bad ki Digital Content.

Nalor kata u la ong ruh ba ka Parish ha Sohra ka dei ka iing kaba don ia ka jingsah kynmaw ia u St. Don Bosco bad kaba la pynlong ia ka kum kawei na ki khyndiat eh kiba kum kine ki jaka ha ka pyrthei.