Plie u CM ia ka surok Hubert Rosario Road ha Mookaswan

Syllad | The Rising MeghalayaMay 22, 2025

U Myntri Rangbah ka jylla u Conrad K Sangma haka 21 tarik Jymmang u la plie paidbah ia ka surok Hubert Rosario Road ha Spein hapoh Mookaswan, West Jaintia Hills ka ban mih sha Hubert Acupressure Centre.

Ia kane ka surok thymmai kaba 1.13 km la shna ha ka jinglut kaba kot T.1.93 klur

Haba kren ha ka jingialang u Myntri Rangbah u la ong ba ka dor jong kino kino ki project kam pynroi kam dei satia ban bishar halor ka jingpynlut ha ka jingbei tyngka hynrei ia ka jingktah ia ka jingim briew.

“Kane ka surok ka lah ban dei ka project kaba T.1.93 klur ha ka jingmang tyngka, hynrei ha nga hi kam long kaba don dor ha ka rukom ba ka ktah ia ka jingim briew khamtam ia kito kiba pang ba shitom bad kiba wad ia ka jingpynkhiah kumjuh ia ki Sister kiba aiti met bad mynsiem ban ai ia ki lad jingsumar,” u la ong.

Haba kdew halor ki sienjam ba la shim da ka sorkar halor ki kam pynroi, u Conrad u la pyntip ba ka jylla ka la bteng ia ka jingbei tyngka na ka bynta ki jingtei bapher bapher.

“Watla tang T.659 klur ki project shna surok kiba la mang hapdeng u snem 1991 haduh  2018, hynrei haduh T.4,000 klur la lah ban mang tang ha kine ki 7 snem kiba la dep. La kumno kumno haduh kumba 70% na baroh ki surok ba la shna hapoh jong ka Pradhan Mantri Gram Sadak Yojana (PMGSY) ha ka jylla ki dei kiba la lah ban pyndep hapoh jong kine ki snem,” u la bynrap.

U la ong ruh ba ka Meghalaya ka la sdang ban kylla long kawei na ki jylla kaba hakhmat eh ka ban pynkhlain ia ki kam bei tyngka na ka bynta ban kyntiew ia ka koit ka khiah ha kaba palat 8% jong ka mang tyngka ba shi snem ka jylla, kata kaba kot palat T.1000 klur la bei na ka bynta ban kyntiew ia ka koit ka khiah. “Ka sorkar ka la kyrshan ym tang ia ki hospital sorkar hynrei ka la iatreilang ruh ba ki hospital ba la pyniaid da ki kynhun Balang.”

Nalor kata u pyntip ruh ba ka Rural Health Center kum ka Hubert Acupressure Centre ka la don ha ka thup jong ka jingai jingiarap ha kaba iadei bad ki jingtei ha ka kylla ka ban wan. U la ong ruh ba ka sorkar ka la shim ia ka rai ban kyrshan ia ki jingai jingsumar tynrai ha kylleng ka jylla

Katba u Symbud Myntri Rangbah ka jylla u Bah Sniawbhalang Dhar haba kren ha ka jingialang u la ai ka jingiaroh ia ka shnong ka thaw halor ka jingiatylli bad ka jingdon mynsiem. U la pynpaw ruh ia ka jingsngew sarong ban ia don bynta lang bad ka thain Mookaswan bad pyrto ia ka jingaiti lut jong ki Sister ha ka jingshakri na ka bynta ka koit ka khiah.

Ha kane ka jingialang la ia don lang ruh u Archbishop Victor Lyngdoh jong ka Shillong Diocese, u Bishop Ferdinand Dkhar ka Jowai Diocese, u MLA ka Jowai u Bah Wailadmiki Shylla, ki ophisar na ka Tnad Public Works Department, ki nongialam shnong bad kiwei kiwei.