Plie u CM Conrad iaka Oyster Mushroom Cluster ha Mendipathar, kaba la kot T.10 klur

Syllad | The Rising MeghalayaAugust 14, 2024

U Myntri Rangbah ka jylla, u Conrad K Sangma haka 13 tarik Nailar u la plie paidbah ia ka Oyster Mushroom Cluster ha Mendipathar ha North Garo Hills.

Kane ka projek kaba la pynlut kaba T. 10 klur, ka thmu ban pynshlur ia ka jingrep jhur tit. Lyngba kane cluster haka kylla kaba nyngkong kin don haduh 1000 ngut ki nongrep ki ban ioh jingmyntoi.

Ia kane ka projek yn pyniaid da ka Mendipathar Multipurpose Cooperative Society, kaba la ïalam da ka Sister Rose, bad la bei tyngka da ka skhim SFRUTI na ka MSME bad T.3 klur la bei pisa na ka sorkar jylla.

Haba ai jingkren ha kane ka sngi, u CM u la ong ba ka jingdawa jhur tit kala nang kiew ha kylleng ki ri pyrthei, bad ka jingthaw ia kum kine ki jaka rep tit kan pyn myntoi ia ki nongrep. U la pynpaw ba ka sorkar ka la sdang ïa ki prokram bapher bapher ban kyrshan ïa ki nongrep.

Haba pynshlur ia ki nongrep ban shim ia ka kam rep tit, u la ong ba ka sorkar kan ai jinghikai bad jingkyrshan ia ki riew shimet bad ki seng kiba sngewtynnad iaka kam.

Ha kane ka prokram u la kaweh lama ruh ia ki kali pickup bad ki top (barrel) ki ban pyndonkam ban pynlang jri ne rubber. U la kdew ba ka thain North bad East Garo Hills ka khlain ban pynmih jri bad ka sorkar kan kyrshan ban iarap da kaba pynbha shuh shuh ban sain jri ban kyntiew iaka dor ka mur ban iarap iaki nongrep ban ioh ia ka kamai kajih kaba kham heh ka jingiohnong.

Ka sorkar kala ai ruh iaka rubber Cinx Unit sha ka Mendipathar Multipurpose Cooperative Society.