Plie u Bah Paul iaki jingtei ha Sahksaw bad Rynji kynthup ka jingkieng doi doi ban kyntiew iaka kam jngohkai

Syllad | The Rising MeghalayaOctober 21, 2023

U Myntri ka tnad Tourism ka sorkar Jylla u Bah Paul Lyngdoh ula plie iaki jaka jngohkai pyrthei ba kynthup ka Rynji Falls & Sahksaw Tourist Spot bad iaka jingkieng doi doi ne Sahksaw Suspension Footbridge haka 20 tarik Risaw.

Ha kane ka sngi la don lang ruh u MLA ka thain bad Myntri Sorkar ba dei khmih iaka tnad Revenue & Disaster ka sorkar Jylla u Bah Kyrmen Shylla, u Director ka Tourism u Bah CVD Diengdoh, ki MDC ka JHADC kiba kynthup ia u Bah Lasky Rymbai, Bah Finelynes Bareh bad Bah Lomris Lyngdoh, u Deputy Commissioner ka East Jaintia Hills District u Abhilash Baranwal, IAS, Principal ka Jaintia Eastern College u Dr. Phervision Nongtdu bad kiwei kiwei.

U Bah Paul Lyngdoh kum u kongsan haka jingkren ula pynsngew sha ki paidbah ka thain ba ka sorkar Jylla ka la dep ban mang pisa kyrpang na bynta ka Latang Falls kaba don haka shnong Lumshyrmit bad mynta ruh ka sorkar ka dang pynkhreh ban mang pisa ban shna iaka jaka ieng kali ha Rynji bad ula ong ba kine baroh kidei lyngba ka jingtrei shitom jong u MLA ka thain ryngkat bad ki nongshong shnong kiba angnud ban kyntiew iaka kam jngohkai.

Haba shim bynta haka jingkren u Bah Kyrmen Shylla ula pynsngew iaki shibun ki kam ba ula iarap naduh ban pynioh iaki skhim bad ban iakren bad ki tnad treikam sorkar bapher bapher. Ula pynsngew ruh ba u angnud ban shna surok naduh Lumshyrmit shaduh Shkentalang bad angnud ruh ban pynheh iaka surok Mukhaialong, Lumshyrmit khnang ban suk ki kali motor kumjuh ki paidbah ban wan sha kane ka jaka.

Iaka jingialang la pyniaid da u Assistant Waheh Shnong u Bah Stop Phawa, ka jingkren pdiang burom na u Secretary Shnong u Bah Dibol Dkhar, katba Waheh Shnong Cham Cham u Bah Karlud Dkhar ula iathuh iaki jaka jngohkai kiba don hapoh u pud u ang ka Dorbar Shnong kynthup naduh ka kshaid Rynji, Sahksaw, view point ne Thwei Marang Beach bad Moosata.

U General Secretary 5 Shnong Welfare Association u Tyrnit Pdein uba la aiti iaka dorkhat sha ki arngut ki myntri ka sorkar Jylla ula iathuh ba iaka Sahksaw Suspension Footbridge la shna lyngba ka District Mineral Fund District Mineral Foundation Trust 2018-19 haka jinglut kaba T.93,85,900.